Douglasgordon

Umræðuþræðir í Hafnarhúsi: Douglas Gordon

Umræðuþræðir: Douglas Gordon
Mánudag 26. september kl. 20 í Hafnarhúsi

Hinn heimskunni myndlistarmaður Douglas Gordon ríður á vaðið með fyrsta erindi vetrarins í fyrirlestraröðinni Umræðuþræðir í Hafnarhúsinu næstkomandi mánudagskvöld. Það er mikill fengur að fá þennan áhugaverða listamann til þess að segja frá því sem hann er að fást við um þessar mundir.

Gordon öðlaðist alþjóðlega viðurkenningu þegar hann hlaut Turner verðlaunin árið 1996 og var fulltrúi Bretlands á Feneyjatvíæringnum árið eftir. Viðfangsefni hans eru af ýmsum toga en iðulega koma pælingar um tíma og minni við sögu. Hann skírskotar í menningarsöguna og sammannlegt minni og útfærir verk í ýmsa miðla, þótt einkum sé hann þekktur fyrir viðamikil myndbandsverk og -innsetningar.

Gordon er um þessar mundir gestakennari við myndlistardeild Listaháskóla Íslands. Umræðuþræðir er samstarfsverkefni Listasafns Reykjavíkur, Listaháskóla Íslands og Kynningarmiðstöðvar íslenskrar myndlistar og var hleypt af stokkunum árið 2012. Síðan þá hafa alþjóðlega viðurkenndir listamenn, fræðimenn og sýningarstjórar staðið fyrir umræðum, haldið erindi og verið gestakennarar hér á landi. Tilgangurinn er að skapa vettvang fyrir skoðanaskipti og alþjóðleg tengsl auk þess sem gestirnir kynnast íslensku listalífi og kynna eigin verk og hugðarefni opinberlega.

Fyrirlestrar fara fram á ensku og eru öllum opnir án endurgjalds.

Viðburðurinn á Facebook

WP2Social Auto Publish Powered By : XYZScripts.com