Jonnu Verk2

„Tjáning og Tíðahvörf“ opnar í SÍM salnum 02.03.

Tjáning og Tíðahvörf er yfirskrift sýningar Jonnu “Jónborgar Sigurðardóttur” og Brynhildar Kristinsdóttur í SíM salnum, Hafnarstræti 16, 101 RVK. Sýningin verður opnuð föstudaginn 2. mars kl. 17.00 og mun opnunin standa til kl. 19.00.

Verk Jonnu á sýningunni eru unnin úr OB töppum og akrýlmálningu. Um síðustu aldamót hóf Jonna að nota OB tappa í myndsköpun. Eftir nokkurra ára hlé ákvað hún að taka þennan listmiðil upp aftur og úr varð sýningin Tíðarhvörf og hefur Jonna einfaldlega þetta að segja um sýninguna: ,, Hormónarnir taka völdin, bless blóð, halló þroski og gleði”!

Jonna útskrifaðist úr fagurlistadeild Myndlistaskólans á Akureyri vorið 1995 og sem fatahönnuður frá Københavns Mode- og Designskole 2011. Myndlist hennar spannar vítt svið, allt frá málverki til innsetninga. Hún hefur verið mjög virk í listalífinu á Akureyri síðustu árin; bæði haldið einkasýningar og tekið þátt í samsýningum.

Verk Brynhildar fjalla um tjáningu mannsins, angist, ótta og hvernig hugmyndir hlutgerast. Í verkum sínum veltir Brynhildur fyrir sér hvers vegna við upplifum svartnætti en létti þegar við náum að dvelj í núinu, tæma hugann, umfaðma lífsorkuna og beina í farveg sköpunar. Verkin eru myndverk og skúlptúrar.

Brynhildur Kristinsdóttir (f.1965) nam myndlist í Myndlistaskólanum á Akureyri og í Myndlista- og Handíðaskóla Íslands. Eftir útskrift úr myndmótunardeild 1989 fór Brynhildur til Ítalíu þar sem hún vann með myndhöggvurum en síðan lá leið hennar í Iðnskólann í Reykjavik þar sem hún lærði húsgagnasmíði en árið 2011 lauk hún kennaranámi frá Háskólanum á Akureyri. Auk þess að starfa við eigin myndsköpun hefur hún kennt myndlist og átt í samstarfi við ýmsa listamenn, gert leikmynd og búninga fyrir gjörninga og dans. Brynhildur hefur haldið nokkrar einkasýningar og tekið þátt í fjölmörgum samsýningum. Hún starfar nú á Akureyri sem kennari og myndlistarmaður.

WP2Social Auto Publish Powered By : XYZScripts.com