SÍM leigir út vinnustofur til félagsmanna í húsnæði við Seljaveg 32, að Hólmaslóð, við Bríetartún og á Korpúlfsstöðum í Reykjavík, Auðbrekku 1 og Auðbrekku 14 í Kópavogi og Lyngási 7 í Garðabæ, en vinnustofurnar eru hátt í 200 talsins.

Vinnustofurnar eru alla jafna fullnýttar, en félagsmenn geta farið á biðlista og ganga þá fyrir ef vinnustofa losnar. Þeir sem eru á biðlistunum þurfa að fylgjast vel með auglýsingum frá SÍM um vinnustofur og hafa samband ef áhugi er fyrir hendi, starfsfólk SÍM hefur ekki samband við þá sem eru á biðlistunum til þess að bjóða vinnustofur sem losna.

Upplýsingar og úthlutunarreglur vegna vinnustofa SÍM

SÍM er samband íslenskra myndlistarmanna sem var stofnað 1983.  Frá upphafi hefur SIM barist fyrir margvíslegum réttindum og hagsmunum myndlistarmanna.

Margt hefur áunnist síðan SÍM var stofnað.

Hagsmunir sem stjórn sambandsins aflar eiga að deilast út til félagsmanna eftir lýðræðislegum reglum. Þegar um er að ræða hagsmuni sem eru af skornum skammti, þ.e. duga ekki til útdeilingar handa hverjum einasta félagsmanni, eru skipaðar nefndir sem fara yfir umsóknir félagsmanna og afgreiða þær.

Öllum hagsmunum og hlunnindum sem SÍM hefur aflað og mun afla í framtíðinni þarf að deila út á lýðræðislegan hátt.

Að gefnu tilefni er ástæða til að kynna þær reglur sem gilda um úthlutun og leigusamninga um vinnustofuhúsnæði SÍM.

Varðandi það húsnæði sem SÍM leigir af af ríki og borg fyrir vinnustofur listamanna fylgir sú kvöð að þess sé gætt að endurnýjun sé ávalt í hópi leigutaka vinnustofanna.

Þetta heitir á formlegu máli að “jafnræðis skuli ávalt gætt við útdeilingu takmarkaðra gæða”

Vegna þrýstings frá félagsmönnum og athgasemda frá ríki og borg, samþykkti stjórn SÍM nýjar úthlutunarreglur á stjórnarfundi þann 18. ágúst 2017.

Nýju reglurnar eiga að tryggja að allir félagsmenn SÍM sitji við sama borð þegar kemur að því að úthluta þeim takmörkuðu gæðum sem SÍM hefur yfir að ráða.

Samþykktar reglur um vinnustofur SÍM tóku gildi 1. Janúar 2018.

1. Vinnustofur SÍM eru leigðar út til 3ja ára í senn (og hefur sú regla verið frá upphafi ).
2. Á 3ja ára fresti eru allar vinnustofurnar lausar til umsóknar.  Skipuð er úthlutunarnefnd sem fer yfir umsóknirnar og úthlutar vinnustofunum.
3. Hægt er að sækja um endurnýjun á leigusamningi 2svar sinnum, ekki er hægt að leigja vinnustofu í sama vinnustofuhúsi lengur en þrjú leigutímabil, 3 x 3 ár eða samtals í 9 ár
4. Þeir félagsmenn sem ekki hafa rétt á að sækja um vinnustofu í sama vinnustofuhúsi og áður, geta þó sótt um í öðru vinnustofuhúsi á vegum SÍM.

Vinnustofuhús SÍM

Langtíma leigusamningar

SÍM hefur verið með vinnustofur fyrir félagsmenn sína á Korpúlfsstöðum frá árinu 1996, þegar 11 vinnustofur voru í boði,

en frá 2006 hefur SÍM verið með allt húsnæðið á leigu.

Korpúlfsstaðir eru í eigu Reykjavíkurborgar.

SÍM hefur verið með vinnustofur fyrir félagsmenn sína á Seljavegi 32, frá árinu 2006.

Seljavegur er í eigu ríkisins.

Þeir listamenn sem höfðu verið meira en 9 ár í sama vinnustofuhúsi, það er að segja á Seljavegi og á Korpúlfsstöðum,

þegar nýtt leigutímabil hófst árið 2018, fengu eitt tímabil í viðbót, eða 3 ár til að aðlagast reglunum.

Yfirstandandi leigutímabili á Seljavegi og á Korpúlfsstöðum lýkur 31. maí 2021 og eru þá allar vinnustofurnar lausar til umsóknar.

Tímabundnir leigusamningar eru um eftirtalin vinnustofuhús.

Lyngás 7, Gb                       3ja ára endurnýjaður leigusamningur –  lýkur 31.08.2021.

Auðbrekka 1, Kóp              5 ára leigusamningur –  lýkur  31.12.2022.

Auðbrekka 14, Kóp            7 ára leigusamningur –  lýkur  31.12.2022.

Hólmaslóð 4, R                   6 ára leigusamningur –  lýkur  31.03.2024.

Biðlisti

Á 3ja ára fresti eru eru allar vinnustofur auglýstar lausar til umsóknar. Félagsmenn sem ekki fá úthlutað vinnustofu geta óskað eftir því að vera settir á biðlista.

Biðlistarnir eru virkir í 3 ár, eða jafnlengi og hvert leigutímabil varir. Ef vinnustofur losna innan þessa 3ja ára leigutímabils, eru þær auglýstar aftur lausar til umsóknar

og getur þá félagsmaður af biðlistanum fengið vinnustofu. (þá er farið eftir röð viðkomandi á biðlistanum)

Biðlistinn er langur yfir hvert tímabil og hafa sumir félagsmenn verið á biðlistanum árum saman.

Húsaleiga

Húsaleiga á Korpúlfsstöðum, Bríetartúni í Reykjavík, Lyngási í Garðabæ og Auðbrekku 1

og 14 í Kópavogi, er Kr. 1.500.- pr. m2 á mánuði, auk vísitölu neysluverðs.

Húsaleiga á Seljavegi, er kr. 1.600.- pr. m2 á mánuði, auk vísitölu neysluverðs.

Húsaleiga á Hólmaslóð, er kr. 1.700.- pr. m2 á mánuði , auk vísitölu neysluverðs.

Stjórn SÍM gætir hagsmuna félagsmanna og gætir jafnframt þess að allir félagsmenn sitji við sama borð og njóti jafnræðis þegar verið er að úthluta þeim

takmörkuðu gæðum sem SÍM hefur yfir að ráða.