26850601 1629342857121783 9072513813624613207 O

Sýningin ‘Verulegar’ framlengd hjá Listasafni Árnesinga

Listasafni Árnesinga opið á ný

Verulegar

Brynhildur Þorgeirsdóttir · Guðrún Tryggvadóttir

Sýningin framlengd til 25. febrúar!

Frá og með fimmtudeginum 18. janúar er Listasafn Árnesinga aftur opið fjóra daga í viku, fimmtudaga – sunnudaga. Þar stendur nú sýningin Verulegar, Brynhildur Þorgeirsdóttir · Guðrún Tryggvadóttir, sem hefur verið framlengd til 25. febrúar.

Hvernig er hægt að mála málverk sem er 4 x 4 metrar að stærð og hvernig er að koma því fyrir til sýningar? Forvitnilegt verk að skoða, ber titilinn Fjórða víddin og er eftir Guðrúnu Tryggvadóttur. Aðalefniviður þess er olíulitir á striga en einnig notast Guðrún við örku og skíra blaðgull. Utandyra má líka sjá stóran skúlptúr sem er tæpir 3 metrar á hæð og amk 2 metrar í þvermál sem ber það virðulega nafn, Árnesingur  og höfundurinn er Brynhildur Þorgeirsdóttir. Ekki að ósekju að sýningin beri heitið Verulegar sem vísar bæði í veruleg verkin, verulega listamenn sem og verur því bæði Brynhildur og Guðrún fást við fígúratífa list. En verkin eru líka óræð og sækja í fantasíuna.

Hvernig kallast verk þeirra beggja á og hvernig geta þau örvað skilningarvit okkar? Sjón er sögu ríkari og heimsókn skemmtilegt viðfangsefni. Starfsfólk safnsins gefur nánari upplýsingar og reynir að svara spurningum sem vakna og börn eru alltaf velkomin, gjarnan í fylgd fullorðna og athafnasvæði er fyrir þau í safninu. Fljólega verður líka auglýst leiðsögn þar sem þær Brynhildur og Guðrún segja frá og svara spurningum.

Þó flest verkanna séu unnin á síðustu þremur árum eru einnig á sýningunni verk frá upphafi ferils þeirra Brynhildar og Guðrúnar þar sem greina má tíðaranda níunda áratugarins þegar form og inntak verkanna birtu viðhorf í andstöðu við hefbundna myndlist þess tíma. Sýningarstjóri er Inga Jónsdóttir safnstjóri en Heiðar Kári Rannversson listfræðingur ritar grein í sýningarskrá sem gefin er út um sýninguna.

Aðgangur að safninu er ókeypis og allir velkomnir.

WP2Social Auto Publish Powered By : XYZScripts.com