20180917 130811 NOTA

Sýningarspjall með Tryggva Hansen

Danshljóðfæri og draumahús náttúruunnanda

Sýningarspjall Tryggva Hansen

Borgarbókasafnið | Menningarhús Árbæ

Þriðjudaginn 2. október kl. 17.00

Tryggvi Gunnar Hansen sýnir um þessar mundir málverk og hljóðfæri sem hann hefur smíðað í Borgarbókasafninu í Árbæ. Þennan þriðjudag ætlar hann að spjalla við gesti um sýninguna og hugmyndir sínar á bak við verkin.

Allir eru hjartanlega velkomnir.

Tryggvi Gunnar Hansen er fæddur á Akureyri 1956. Hann stundaði nám í myndlist í Myndlista- og Handíðaskólanum á árunum 1978 til 1984. Einnig hefur hann lært heimspeki, þjóðfræði, sálfræði, ásamt torfhleðslu og byggingarlist. Sveinn Einarsson frá Hrjóti og Stefán í Brennigerði kenndu Tryggva listina að hlaða úr torfi og grjóti en þá iðju stundaði hann um 20 ára skeið.

Undanfarin ár hefur Tryggi helgað sig rannsóknum á þjóðfræði og má raunar segja að listsköpun hans snúist að miklu leyti um þau fræði. Um aldamótin ferðaðist Tryggvi til Evrópu, mest norður- og austurhlutann og kannaði þjóðlönd og fornann menningararf. Hann telur að með því að bera saman þjóðmenningu frá ýmsum tímabilum og landssvæðum getum við fengið betri sýn á fortíðina og einfaldara sé byggja upp betra þjóðfélag. Í Evrópu var ríkjandi náttúrumenning líkt og meðal Indíána í Ameríku en hún hvarf þegar þjóðríkið tók við en það var stofnað af herforingjum. Tryggvi vill að mannkynið hverfi aftur til fyrra skipulags þar sem allir höfðu aðgang að valdinu og vopn voru óþörf. Hann vitnar m.a. í rannsóknir Mariu Gimbutas við Svartahaf þar sem fundist hafa minjar um byggð þar sem menning var á háu stigi en engin vopn.

Tryggvi sér fyrir sér samfélag í sátt við náttúruna án stéttskiptingar og misskiptingar valds. Listaverkin á sýningunni tengjast þeirri hugsjón en myndunum má m.a. sjá híbýli sem falla vel að náttúrinni og hljóðfæri sem hann smíðar sjálfur með eldri hljóðfæri úr Evrópu sem fyrirmynd. Tryggvi lætur sér ekki nægja að setja fram hugmyndir hann framkvæmir líka og má geta þess að hann hefur kosið að búa í tjaldi allan ársins hring í útjaðri Reykjavíkur.

Sýning Tryggva stendur út októbermánuð.

WP2Social Auto Publish Powered By : XYZScripts.com