14882178 1198988810157192 8388344018524191307 O

Sýningarspjall með Aðalheiði í Listasafni Árnesinga

Listasafn Árnesinga, sunnudaginn 6. nóvember. kl. 15

Sýningunni Tímalög – Karl Kvaran og Erla Þórarinsdóttir fer senn að ljúka og sunnudaginn 6. nóvember kl. 15 mun Aðalheiður Valgeirsdóttir, önnur tveggja sýningarstjóranna, ganga með gestum um sýninguna, segja frá og svara spurningum. Á sýningunni eru til skoðunar málverk eftir Karl (1924-89) frá tímabilinu 1968–1978 og verk eftir Erlu (1955) frá síðustu tíu árum, einkum málverk en einnig skúlptúra.

Karl Kvaran rannsakaði rækilega þanþol og möguleika gvasslitarins og vann nánast óslitið með hann í tæpa tvo áratugi, allt frá árinu 1956. Verk hans frá þessum tíma grundvallast á kröftugri línuteikningu sem síðar leikur mikilvægt hlutverk í olíumálverkum hans á 8. áratugnum.
Verk Erlu eru byggð upp af línuteikningu sem sveigir og beygir formin svo þau framkalla sjónræn þrívíddaráhrif. Erla leggur verkin sín oft blaðsilfri sem ýmist þekur ákveðin form eða undirstrikar einstaka þætti þeirra. Með því að leyfa silfrinu að oxast breytist litur þess og eitt verkanna á sýningunni er enn virkt og áhugavert að fylgjast með þeim breytingum sem það tekur meðan á sýningunni stendur.

Ferill tímans er greinanlegur í verkum þeirra Erlu og Karls sem þau útfæra á persónulegan hátt og mismunandi tímalög má sjá í sýningunni sem og í undirmeðvitund málverksins. Hinn huglægi þáttur er eitt af því sem sameinar verk listamannanna. Í málverkum Erlu á sér stað ákveðið íhugunarferli þar sem andleg gildi leiða áhorfandann um innri hugarheima. Í list sinni leitaði Karl sífellt inn á við og leitin að hinu klára og tæra var drifkrafturinn í list hans. Í verkum sínum hafa þau skapað óhlutbundna myndheima þar sem litur, form og lína kallast á, en vinnuaðferðir þeirra hvað varðar áferð og tækni eru ólíkar.
Aðalheiður er myndlistarmaður og sjálfstætt starfandi listfræðingur og sýningarstjóri. Hún útskrifaðist úr Myndlista- og handíðaskóla Íslands árið 1982 og lauk BA-prófi í listfræði með menningarfræði sem aukagrein frá HÍ árið 2011 og MA-gráðu árið 2014.
Sýningunni Tímalög lýkur 13. nóvember og því síðustu forvöð að skoða hana . Safnið er opið fimmtudaga til sunnudaga kl. 12 – 18 og aðgangur er ókeypis, líka á sýningarspjallið og allir velkomnir í safnið.

WP2Social Auto Publish Powered By : XYZScripts.com