IMG 5620

Sýningaropnun: ÞVÍLÍKIR TÍMAR / THESE TIMES í Hverfisgalleríi

Kristinn E. Hrafnsson myndhöggvari opnar í Hverfisgalleríi laugardaginn 24. febrúar nk. kl 16.00 einkasýninguna ÞVÍLÍKIR TÍMAR /THESE TIMES og leikur hugtakið tíminn stórt hlutverk á sýningunni, jafnvel stærra hlutverk en á fyrri sýningum listamannsins. Kristinn hefur verið virkur í íslensku myndlistarlífi í um þrjá áratugi, tekið þátt í fjölda sýninga hér á landi og erlendis og á fjölmörg verk í opinberu rými, í alfaraleið á höfuðborgarsvæðinu og víðar. Í skúlptúrum og textaverkum á sýningunni leitar listamaðurinn í mátt orðsins til að ná einhverjum tökum á margræðni tímans en Kristinn hefur löngum fengist við þær aðferðir sem menn hafa notað til að staðsetja sig og ná áttum í veröldinni og endurspeglar þannig ákveðna sýn á heiminn og tilfinningu fyrir umhverfinu. ÞVÍLÍKIR TÍMAR /THESE TIMES er þriðja einkasýning Kristins í Hverfisgalleríi.

Kristinn E. Hrafnsson er fæddur árið 1960 á Ólafsfirði. Hann stundaði nám í Myndlistarskólanum á Akureyri og við Myndlista- og handíðaskóla Íslands og lauk framhaldsnámi í Akademie der Bildenden Künste í München í Þýskalandi árið 1990. Kristinn býr og starfar á Seltjarnarnesi. Í verkum Kristins má greina heimspekilegan þráð og vangaveltur um rúm og tíma, hreyfingu, afstæði og tungumál. List hans fjallar um manninn og skilning hans á umhverfi sínu og hvernig náttúran mótar sýn hans og samskipti.
Samband listaverksins við vettvanginn er mikilvægur þáttur í verkum Kristins, en á ferli sínum hefur hann gert fjölda umhverfisverka, ýmist einn eða í samvinnu með arkitektum.

Verk Kristins hafa verið sýnd á Íslandi og víða um Evrópu og er verk hans að finna í öllum helstu listasöfnum á Íslandi sem og í opinberum söfnum og einkasöfnum.

WP Facebook Auto Publish Powered By : XYZScripts.com