Listasafnreykjavíkur

Sýningaropnun: Hafnarhús – pakkhús hugmynda í miðborginni

Fimmtudag 18. júní kl. 20 í Hafnarhúsi

Sýningin Hafnarhús – pakkhús hugmynda í miðborginni verður opnuð fimmtudaginn 18. júní kl. 20.00 í Listasafni Reykjavíkur – Hafnarhúsi. Ólöf Bjarnadóttir, safnfræðingur, er sýningarstjóri sýningarinnar.

Í ár eru 20 ár frá því að hluti Hafnarhússins varð eitt af þremur safnhúsum Listasafns Reykjavíkur. Í tilefni af þessum tímamótum er efnt til sýningar þar sem Hafnarhúsið sjálft er í forgrunni og saga þess og umbreyting í listasafn gerð skil. Einnig er skoðað hvernig safnbyggingin sem rými vinnur með listinni og tengist umhverfi sínu – borgarrýminu. Á sýningunni eru bæði gamlar teikningar og ljósmyndir en einnig teikningar, ljósmyndir og líkan sem sýnir umbreytingu Studio Granda þegar Listasafni Reykjavíkur og Erró-safneigninni var fundinn þar staður.

Hjálmar Sveinsson, formaður menningar-, íþrótta- og tómstundaráðs, opnar sýninguna.

Hafnarhúsið var upprunalega hannað sem skrifstofu- og vörugeymsluhús Reykjavíkurhafnar á fjórða áratug síðustu aldar. Á þeim tíma var höfnin líflína borgarinnar við umheiminn og var Hafnarhúsið því vegna staðsetningar sinnar frá upphafi virkur þátttakandi í borgarlífinu. Byggingin var hönnuð undir áhrifum frá stefnu sem kennd var við funksjónalisma og gerði kröfu um samvirkni forms og notagildis. Þannig endurspeglaðist upphaflegt hlutverk byggingarinnar í hönnuninni og tengdi hana umhverfi sínu.

Undir lok 20. aldar þróaðist svæðið við Reykjavíkurhöfn mikið vegna breytinga á hafnarstarfseminni sem varð til þess að Hafnarhúsið glataði sínu upphaflega hlutverki. Tekin var ákvörðun um að koma Listasafni Reykjavíkur fyrir í hluta af Hafnarhúsinu en talið var að staðsetning safnsins þar gæti m.a. endurnýjað tengslin milli miðborgarinnar og hafnarsvæðisins sem glatast höfðu árin á undan. Þannig gæti listasafnið hjálpað til við að virkja umlykjandi borgarrými og Hafnarhúsið orðið á ný virkur þátttakandi í miðborginni, að þessu sinni í gegnum list og menningu. Arkitektastofan Studio Granda varð hlutskörpust í samkeppni um hönnun Listasafns Reykjavíkur í Hafnarhúsi. Í tillögu sinni unnu þau með sögu staðarins með það að leiðarljósi að opna aftur tenginguna við höfnina. Einnig var í tillögunni leitast við að halda í einkenni upphaflegu byggingarinnar og halda þannig í söguleg tengsl, þar á meðal portið í miðju hússins sem á sér fáar hliðstæður í íslenskri byggingarsögu.

Meistararitgerð Ólafar Bjarnadóttur í safnafræðum, Safnrýmier skapað og í raun skilgreint af hönnuninni: Safnbyggingar og Hafnarhúsið sem rými í borg fjallar um safnbyggingar sem rými í borg. Í ritgerðinni greindi hún safnhús Listasafns Reykjavíkur í Hafnarhúsinu út frá rými, bæði Því rými sem það sjálft umlykur en einnig hvernig það tengist umhverfi sínu, sjálfu borgarrýminu. Ástæðan fyrir því að þetta viðfangsefni varð fyrir valinu má líklega að hluta til rekja til þeirrar staðreyndar að Ólöf er með BA-gráðu í arkitektúr frá Listaháskóla Íslands og er nú í vor að ljúka mastersgráðu í safnafræði frá Háskóla Íslands. Henni þykja safnbyggingar áhugaverðar og þá sérstaklega hvernig þær geta mótað og haft áhrif á umhverfi sitt.

Sýningin stendur til 16. júlí 2020. Frítt inn í Hafnarhúsið á fimmtudagskvöldum í sumar.  

Dagskrá
Steve Christer, arkitekt hjá Studio Granda, leiðir gesti um Hafnarhúsið, sunnudaginn 28. júní kl. 14.00.

Ólöf Bjarnadóttir, sýningarstjóri, verður með leiðsögn um sýninguna, laugardaginn 4. júlí kl. 14.00.

WP2Social Auto Publish Powered By : XYZScripts.com