Sýningarlok í Hafnarhúsinu, Sirra Sigrún og Gunter Damisch

Sirra Sigrún Sigurðardóttir: Flatland

 

Sýningum Sirru Sigrúnar og Gunter Damisch lýkur næstu helgi í Hafnarhúsinu

Nú fara að verða síðustu forvöð að sjá sýningar þeirra Sirru Sigrúnar Sigurðardóttur, Flatland, og austurríska listamannsins Gunter Damisch, Veraldir og vegir, í Hafnarhúsinu en þeim lýkur báðum á sunnudaginn 25. janúar.

Titill sýningar Sirru Sigrúnar (f.1977) vísar m.a. til samnefndrar bókar frá 1884 eftir Edwin Abbott þar sem dregin er upp háðsádeila af lagskiptingu samfélagsins með tungumáli stærð- og rúmfræðinnar. Sirra Sigrún tekur þetta leiðarstef og tengir við hugleiðingar og vangaveltur um samtímann. Sirra Sigrún nam myndlist við Listaháskóla Íslands og School of Visual Arts, New York. Hún hefur sýnt víða, bæði hér heima og erlendis, m.a. í Hafnarborg, Listasafni Reykjavíkur og Tate Modern í London. Sirra Sigrún er einn stofnenda og eigenda sýningarstaðarins Kling & Bang í Reykjavík og er í hópi áhrifamikilla listamanna hér á landi.

Sýning Gunter Damisch (f. 1958)  er yfirlit á verkum hans frá níunda áratugnum til dagsins í dag. Á sýningunni er skúlptúr og grafísk verk sem listamaðurinn hefur gefið Listasafni Reykjavíkur ásamt úrvali annarra verka eftir hann. Verk Damisch eru fjölbreytt, myndheimurinn er lifandi og verkin flökta milli myndrænnar túlkunar og hins óhlutlæga.  Gunter Damisch varð þekktur á níunda áratugnum sem einn af hinum ,,Hinum nýju villtu“, Neue Wilde, sem var óformlegur hópur ungra listamanna sem brást við meintri hnignun málverksins á alþjóðavísu með því að mála kraftmiklar og litríkar myndir. Frá árinu 1992 hefur listamaðurinn verið prófessor við Listaháskólann í Vínarborg.

WP2Social Auto Publish Powered By : XYZScripts.com