Fugl

Sýning á ljósmyndum Ragnars Axelssonar í Ásmundarsal

Ljósmyndasýning Ragnars Axelssonar í Ásmundarsal, Freyjugötu 41, sem ber nafnið Jökull opnaði núna síðastliðna helgi. Ásmundarsalur er opinn frá klukkan 8-17 mánudaga til föstudaga, og svo frá klukkan 9-17 á laugardögum og sunnudögum. Sýningin stendur frá 13. október til 30. nóvember næstkomandi.

Samhliða sýningaropnun hófst sala á ljósmyndabók Ragnars í Ásmundarsal sem ber einnig heitið Jökull og er gefin út af bókaútgáfunni Qerndu.

Jökull eru óður til jökla á Íslandi, myndræn lofgjörð eftir hinn kunna heimildaljósmyndara Ragnar Axelsson. Ragnar ólst upp í grennd við jökla og hefur flogið vél sinni í ótal skipti yfir hjarnbreiður þeirra. Hann er því nátengdur freðanum sem hefur mótað land og hugarheim Íslend-inga og heillað Ragnar allt fá öndverðu. Nær því óhlutdrægar svart-hvítar myndir og gagnorðir, íhugulir textar opna okkur sýn yfir form, áferð og mynstur jökla eins og þau birtast á flugi sem hefst ofar skýjum og lýkur við sjávarmál.

Ljósmyndirnar, sem teknar voru á undanförnum tíu árum, eru í senn jarðneskar og yfirskilvitlegar, ólgandi af krafti og kyrrstæðar, framandi og kunnuglegar. Örsmáar mannverur minna okkur í fyrstu á hversu jöklarnir eru víðáttumiklir en fyrr en varir skynjum við ekki lengur nein stærðarhlutföll og verðum í sífellu að endurmeta afstöðu okkar til þess sem ber fyrir augu – og hvað það er í raun og veru sem við erum vitni að. Smáatriði á yfirborði íssins, sem er á stöðugri hreyfinu, dregin skörpum dráttum með eldfjallaösku, leiða í ljós hversu náttúruöflin eru máttug en á sama tíma er ósýnilegur, óstöðvandi kraftur einnig að verki í jöklinum. Ekkert getur komið í veg fyrir að jöklar á Íslandi bráðni, hopi  og hverfi. Eftir tvær aldir mun hvergi sjá þeirra merki.

Jökull eru 200 bls. og í bókinni eru 140 svart-hvítar ljósmyndir, prentaðar í þrílit. Bókin er 345×240 mm. Hönnun og umsjón: Einar Geir Ingvarsson.

Ólafur Elíasson, myndlistarmaður, skrifar formála og Tómas Guðbjartsson, hjartaskurðlæknir og fjallgöngumaður, á lokaorðin í bókinni.

WP2Social Auto Publish Powered By : XYZScripts.com