Fghtfyuft

Sunneva Ása Weisshappel – Umbreyting

Gallery Port – 19. – 29.01.19

„Ég er „hoarder“.
Amma mín er líka „hoarder“ og alltaf að gefa mér gamalt dót.
Dótið okkar ömmu hefur smám saman verið að fylla heimili mitt og stúdíó.
Það sama og gerðist smám saman innra með mér þar til ég tók algera U-beygju.“

-Sunneva Ása Weisshappel

Drasl sem er afurð fjölda- og offramleiðslu liggur í myrkri þar sem fegurð þess er hulin og öllum gleymd. Plast, segjum við. Einnota. Ódýr kátína sem smyglar sorg og ljótleika inn í daglegt líf. En þá kemur náðin til sögunnar; hin líknandi hönd sem tínir saman brotin, setur þau saman á nýjan hátt og leiðir nýskapnaðinn inn í ljósið.

Með því að setja ólíka hluti saman verður til myndmál. Með uppfyllingu verða til form og skúlptúrar sem koma að innan. Formin umbreytast og tilgangur fæðist. Sú einfalda athöfn að losa sig við uppsafnað drasl byrjar smám saman að öðlast merkingu. Myrkur verður ljós.

Umbreytingin kostar ómæld átök. Eins og að snúa trukki á fullri ferð um 180 gráður. Hvernig gerir maður það?

Um leið er þetta ekki annað en lífrænt ferli. Þolinmæðisverk sem einungis verður unnið með því að gefast aldrei upp og jafnframt að afsala sér allri stjórn. Þannig verður til hámenningarlegt kitsch. Rókókó úr drasli sem annars hefði farið á haugana. Sunneva Ása Weisshappel rekur stefnumótaþjónustu fyrir lágkúru og hámenningu. Sorp verður safngripir. Verði lampi. Verði ljós. Verði spegill. Verði afskræmd, lífræn fegurð. Verði ský með óljósum og óvæntum formum. Dulin heimspeki. Hversdagsleg dulspeki. Verði landslag. Landslag af nútímasamfélagi. Verði verðmæti.

– Guðrún Eva Mínervudóttir upp úr samtali við Sunnevu Ásu Weisshappel

Sunneva Ása Weisshappel útskrifaðist af myndlistarbraut við Listaháskóla Íslands árið 2013. Í kjölfarið stofnaði hún Algera Studio. Hún rak stúdíóið í þrjú ár og hélt þar fjölda viðburða og sýninga ásamt meðlimum Algera.

Sýningin Umbreyting er fyrsta einkasýning Sunnevu eftir útskrift.

Í myndlist Sunnevu er sjálfinu gjarnan stillt upp sem rannsóknarvettvangi til að skoða og spegla samtímann. Sunneva Ása hefur sýnt myndlist sína víða, hér heima og erlendis, og unnið í residensíum. Myndlistin er fremsta víglínan í rannsóknarvinnu Sunnevu, þaðan sem hún sækir efnivið í aðra miðla.

Þá hefur Sunneva Ása leikstýrt og unnið við gerð fjölda tónlistarmyndbanda og fengið tilnefningar til verðlauna, bæði hérlendis og erlendis. Frumraun Sunnevu Ásu í búningahönnun fyrir leikhús var Njála og hlaut hún Grímuverðlaun 2015 fyrir búningana í þeirri sýningu. Hún hefur í framhaldi unnið aðallega erlendis við búningahönnun en jafnframt sinnt myndbandagerð og kóreógrafíu fyrir leikhúsverk, óperu og ballet.

Gallery Port
Laugavegur 23b
101 Reykjavík

WP Facebook Auto Publish Powered By : XYZScripts.com