Asgr.Jonsson Sjalfsm LI AJ–415

SPEGILMYND – ný sýning í Safni Ásgríms Jónssonar og vefsýning á verkum hans.

SPEGILMYND 11.10.2015 – 30.11.2015, Safn Ásgríms Jónssonar

Sunnudaginn 11. október kl. 14. verður opnuð sýningin Spegilmynd í Safni Ásgríms Jónssonar, Bergstaðastræti 74. Þar má sjá úrval sjálfsmynda eftir Ásgrím Jónsson. Í safneigninni er að finna 29 verk með heitinu Sjálfsmynd. Elstu sjálfsmyndina af þeim sem til eru í safninu málaði Ásgrímur sama árið og hann hóf nám við Listaháskólann í Kaupmannahöfn, árið 1900. Á dönskum söfnum hafði hann aðgang að úrvali myndlistar eftir marga helstu listamenn álfunnar. Meðal verka sem hann hreifst af voru mannamyndir eftir hollenska meistarann Rembrandt van Rijn (1606–1669) þar sem listamaðurinn lýsir fyrirmyndina á nýstárlegan hátt. Rúmlega tvítugur endurskapar Ásgrímur ásjónu sína með olíulitum á striga þar sem hann horfir rannsakandi á sjálfan sig í speglinum. Það á einnig við um þær óvægnu myndir sem hann, þá á áttræðisaldri, dregur upp í einni hendingu með vatnslitum. Í þessum sjálfsmyndum má fylgja listamanninum gegnum lífið og fylgja þróun hans sem listamanns. Báðir þeir listamenn sem Ásgrímur dáði hvað mest, Rembrandt og Vincent van Gogh notuðu sjálfsmyndina sem tjáningu lita, ljóss og skugga og jafnvel leið til dýpri sjálfsskilnings og sjálfsagt hefur Ásgrímur verið meðvitaður um þýðingu slíkrar iðju eins og þeir sem nú til dags taka markvisst sjálfskot. Vinnustofa listamannsins skapar verkunum persónulega umgjörð og nánd.

Öflug fræðsludagskrá hefur verið skipulögð í tengslum við sýninguna sunnudagana 11., 18. og 25. október auk 1., 8. og 15., 22. og 29. nóvember. Sjá nánar á heimasíðu Listasafns Íslands.

Sýningin Spegilmynd kallast á við yfirstandandi sýningu í Listasafni Ísland, Valin portrett í safneign Listasafns Íslands – Frá sveitungum til sjálfskota í sal 3 sem standa mun til 1. nóvember.

LISTAMAÐUR ÞJÓÐARINNAR – VEFSÝNING Á VÖLDUM VERKUM EFTIR ÁSGRÍM JÓNSSON
Sunnudaginn 11. október kl. 15.30 verður opnuð vefsýning á heimasíðu Listasafns Íslands á völdum verkum eftir Ásgrím Jónsson. Vefsýningin er unnin með styrk frá Rannsóknarsjóði Íslands, Nýsköpunarsjóði námsmanna af Vigdísi Rún Jónsdóttur nemanda í listfræði við Háskóla Íslands. Umsjónarmenn verkefnisins voru Rakel Pétursdóttir, deildarstjóri rannsókna og sérsafna við Listasafn Íslands og dr. Hlynur Helgason, lektor við Háskóla Íslands. Verkefnið er þáttur í viðleitni Listasafns Íslands að gera þau fjölmörgu verk sem safnið varðveitir aðgengileg í gegnum netið. Sýningin ber heitið Listamaður þjóðarinnar, vefsýning á völdum verkum eftir Ásgrím Jónsson. Listaverkagjöf Ásgríms til íslensku þjóðarinnar inniheldur rúmlega 700 olíu- og vatnslitamyndir, fullgerðar sem ófullgerðar, á annað þúsund teikningar og 150 teiknibækur auk fjölda ófullgerðra mynda frá ýmsum tíma. Viðfangsefni Ásgríms voru fjölbreytt og má skipta myndum hans í nokkra efnisflokka, svo sem þjóðsagnamyndir, landslagsmyndir, borgarlandslag, mannlífsmyndir og kyrralífsmyndir.

Á vefsýningunni Listamaður þjóðarinnar eru valin verk úr eftirfarandi efnisflokkum: Þjóðsagnamyndir – þar sem listamaðurinn myndskreytir íslenskar þjóðsögur og ævintýri. Landslagsmyndir – þar er myndefnið að stórum hluta frá Húsafelli og Þingvöllum. Borgarlandslag – sem sýnir Reykjavík og nágrenni. Stuttur texti fylgir hverjum flokki. Skoða má vefsýninguna á slóðinni http://www.listasafn.is/safneign/innkaupanefnd/vefsyning/

WP2Social Auto Publish Powered By : XYZScripts.com