Torg

SÍM: Torg Listamessa 2021 – Opið fyrir umsóknir

TORG – Listamessa í Reykjavík verður haldin í þriðja sinn dagana 1. til 3. og 9. til 10. október 2021.

Sem fyrr verður TORG-ið haldið á Korpúlfsstöðum og stendur öllum félagsmönnum SÍM til boða að senda inn umsókn. Senda skal inn umsókn og portfolio með myndum af verkum.  

TORG – Listamessa í Reykjavík er hugsuð sem vettvangur fyrir listamenn til að kynna sína myndlist og selja hana, án aðkomu milliliða og um leið veita áhugafólki um íslenska myndlist tækifæri til að fjárfesta í myndlist beint frá listamanninum.

Líkt og áður verður boðið upp á að leigja þar til gerða sýningarbása, sem samsettir eru úr hvítum þiljum. Hvert þil er rétt tæpur 1m á breidd og 2,30  á hæð. Hvert þil kostar 5000 kr. Listamenn geta verið einir með bás, en einnig er í boði að tveir eða fleiri taki sig saman og deili sýningarrými. Skilyrði er að allir þátttakendur séu fullgildir félagsmenn í SÍM og þeir sjái sjálfir um að kynna verk síns í básunum.

Ljóst er að aldrei verður hægt að uppfylla óskir allra umsækjenda um stærð og lögun bása, en mikilvægt er að í umsókn komi fram óskir um fjölda þilja. Bent skal á að húsnæðið takmarkar þann földa bása sem hægt er að bjóða upp á.

Vegna mikils fjölda umsókna á undanförnum árum mun sýningarnefnd TORGsins fara yfir umsóknir um þátttöku og útdeila sýningarrýmum.

Samþykki sýningarnefnd þátttöku þína, færð þú sendan tölvupóst með upplýsingum um staðfestingargjald, sem í ár verður 15.000 kr., sem verður óendurgreiðanlegt (e. Non refundable). Öllum umsóknum verður svarað.

SÍM mun útbúa auglýsingaefni fyrir TORG og því mikilvægt að allir sem taka þátt séu skráðir. Einnig verður stefnt að því að ráða sérstakan kynningarfulltrúa TORGsins sem mun hafa samband við fjölmiðla.

SÍM mun, eftir sem áður, bjóða upp á greiðslusamninga við kaup á listaverkum sem gera kaupendum kleift að greiða listaverk með jöfnum, vaxtalausum mánaðargreiðslum í allt að 36 mánuði. Slíkan samning má aðeins gera fyrir verk sem kosta að hámarki 500.000kr, en með þessum hætti aukast möguleikar á viðskiptum milli kaupenda og listamanna.

Torg – Listamessa í Reykjavík 2019 heppnaðist einstaklega vel og voru umsagnir þátttakenda og gesta mjög jákvæðar. Sala á listaverkum fór fram úr björtustu vonum og hefur sú kynning sem hlaust af listamessunni, í sumum tilfellum, leitt til áframhaldandi aukningar viðskipta.

ATH: Vegna hins mikla földa gesta sem sótti messuna árið 2019 hefur verið ákveðið að messan standi tvær helgar, dagana 1. til 3. og 9. til 10. október.

Við hvetjum ykkur öll til að senda inn umsókn.

Umsókn má fylla út hér:  https://forms.gle/L4T5QBE4Xx1AuTC17

Umsóknarfrestur rennur út  Þriðjudaginn 22. júní 2021 kl.  23:55

WP2Social Auto Publish Powered By : XYZScripts.com