Borgarsogusafn12

Setning Ljósmyndahátíðar Íslands og opnun sýningar Valdimars Thorlacius 16. janúar

Ljósmyndahátíð Íslands hefst fimmtudaginn 16. janúar kl. 17 með opnun sýningar Valdimars Thorlacius í Ljósmyndasafni Reykjavíkur. Hjálmar Sveinsson, formaður menningar-, íþrótta- og tómstundaráðs Reykjavíkur, opnar sýninguna. Pétur Thomsen listrænn stjórnandi Ljósmyndahátíðar Íslands setur hátíðina.

Sýningin sem ber yfirskriftina „···“ er í senn sjónræn túlkun á upplifun Valdimars af smábæjum, fólki, veðri og víðáttu á Íslandi og heimild um lífið í þorpinu. Við vinnslu verkefnisins fór hann á milli þeirra staða sem uppfylltu ákveðin skilyrði út frá skilgreiningu Hagstofunnar um stærð og gerð þéttbýliskjarna með allt að 500 íbúum.

„Ég myndaði það sem greip athygli mína í þorpunum, umhverfi íbúa þessara bæja og set í bland við víðara sjónarhorn, eyjuna Ísland. Markmiðið er ekki að birta algeran sannleika um lífið í smábæjum Íslands. Ég sýni valin augnablik og býð áhorfandanum að fylla sjálfum í eyðurnar. Nær ómögulegt er að nálgast algeran raunveruleika í ljósmynd þar sem túlkun hennar er ávallt þess sem horfir.  Raunveruleiki verksins er því sameiginleg niðurstaða þess sem myndað er og skynjunar þess sem upplifir myndirnar.“

Valdimar Thorlacius. Valdimar Thorlacius lærði ljósmyndun við Ljósmyndaskólann og lauk þaðan námi 2014. Útskriftarverkið  I -Einn/Ein kom út í bókarformi í kjölfar útskriftar og hlaut styrk úr Minningarsjóði Magnúsar Ólafssonar það sama ár. Árið 2015 var svo opnuð  fyrsta einkasýning hans í Þjóðminjasafni Íslands með myndum úr verkinu  I -Einn/Ein, samhliða útgáfu Crymogeu á annarri útgáfu bókarinnar I. Verkið hefur verið á sýningum erlendis og má þar helst nefna einkasýningu á frönsku listahátíðinni Les Boreales 2017.

Nánari upplýsingar um Ljósmyndahátíð Íslands má finna á http://tipf.is/

WP2Social Auto Publish Powered By : XYZScripts.com