Rúllandi snjóbolti/6, Djúpivogur

Untitled-3 copy

 

Alþjóðlega myndlistarsýningin „Rúllandi snjóbolti/6, Djúpivogur“ verður opnuð laugardaginn11. júlí nk. kl. 15:00 í Bræðslunni á Djúpavogi, sem breytt hefur verið í sýningarsal. Alls taka 26 listamenn frá Kína, Íslandi, Hollandi og fleiri löndum þátt í sýningunni sem er skipulögð af Chinese European Art Center (CEAC).
Sýningin er samstarfsverkefni Djúpavogshrepps og CEAC. Kínversk-evrópska menningarmiðstöðin er fyrir löngu orðin þekkt í kínverska og evrópska listaheiminum og hefur staðið fyrir mörgum, stórum sýningum í Kína. Ísland var fyrsta landið utan Kína þar sem stofnunin stóð fyrir sýningu, en það var „Rúllandi snjóbolti/5, Djúpivogur“ sem opnuð var síðastliðið sumar í Bræðslunni á Djúpavogi.
Flestir listamannanna sem þátt taka í sýningunni eru alþjóðlegir. Þátttakendur fyrir Íslands hönd eru Árni Páll Árnason, Finnbogi Pétursson, Hekla Dögg Jónsdóttir, Hrafnkell Sigurðsson, Kristján Guðmundsson, Ólöf Nordal, Ragnar Kjartansson, Rúna Þorkelsdóttir, Sigurður Guðmundsson og Þór Vigfússon.
CEAC er sjálfseignarstofnun sem stofnuð var árið 1999 af Ineke Guðmundsson með fjárhagslegum stuðningi eiginmanns hennar, Sigurðar Guðmundssonar, listamanni. Eitt af markmiðum CEAC er að stuðla að menningarlegum samskiptum milli Kína og Vesturlanda. Stofnunin hefur í gegnum árin kynnt bandaríska, kanadíska, ástralska og íslenska listamenn í Kína.
Djúpavogshreppur er aðili að Cittaslow hreyfingunni sem eru samtök lítilla sveitarfélaga í 27 löndum víðsvegar um heiminn. Markmið Cittaslow er að auka lífsgæði og ánægju fólks með því að veita hnattvæðingu, einsleitni og hraðaáráttu í borgum og bæjum nútímans viðnám og heiðra þess í stað sérstöðu hvers sveitarfélags fyrir sig. Cittaslow sveitarfélög leggja m.a. áherslu á verndun náttúru og menningarminja, fegrun umhverfis, umhverfisgæði, eflingu staðbundinnar matarmenningar, gestrisni, kurteisi og vinsamlegt viðmót. Það er í þeim anda sem Djúpavogshreppur tekur þátt í sýningunni í samvinnu við CEAC.
Opnunarhátíð sýningarinnar fer fram í Bræðslunni, Víkurlandi 6, Djúpavogi þann 11. júlí milli kl. 15:00 og 17:00. Illugi Gunnarsson, mennta- og menningarmálaráðherra mun opna sýninguna ásamt Zhang Weidong, sendiherra Kína á Íslandi. Boðið verður upp á mat úr drykk úr héraði.

WP2Social Auto Publish Powered By : XYZScripts.com