Reykjavíkurborg

Reykjavíkurborg: Kjarvalsstofa í París – opið fyrir umsóknir

Kjarvalsstofa er stúdíóíbúð/vinnustofa í miðborg Parísar, sem listamenn geta sótt um að fá leigða á tímabilinu 3. ágúst 2020 til 29. júlí 2021. Á árinu 2020 er leiguverð 1.138 evrur fyrir tveggja mánaða dvöl fyrir einstakling, en íbúðin er leigð út í tvo mánuði í senn. Ætlast er til að dvalargestir skili inn stuttri greinargerð eftir dvöl sína í París. 

Opnað verður fyrir umsóknir um dvöl í Kjarvalsstofu 20. febrúar og verður hægt að sækja um til 20. mars. Hægt er að sækja um á vef Reykjavíkurborgar hér: https://reykjavik.is/thjonusta/kjarvalsstofa-i-paris

Hvað er Kjarvalsstofa?

Kjarvalsstofa er 40 fm stúdíóíbúð/vinnuaðstaða sem ætluð er til dvalar fyrir listamenn. Íbúðin er hluti af alþjóðlegu listamannamiðstöðunni Cité des Arts, sem staðsett er í miðborg Parísar, skammt frá Notre Dame dómkirkjunni. Stofan er í umsjá Reykjavíkurborgar og mennta- og menningarmálaráðuneytisins.

Auk stúdíóíbúðarinnar er hægt að leigja aðgang að ýmsum öðrum rýmum í listamannamiðstöðinni, til að mynda æfingarýmum með flygli eða píanói, aðstöðu til tónleikahalds, leirbrennsluofn ofl. Sjá nánar á heimasíðu Cité Internationale des Arts, og í verðskrá hér til hægri á síðunni.

Hvernig er sótt um?

Opið verður fyrir umsóknir um dvöl í Kjarvalsstofu 20. febrúar – 20. mars 2020 vegna tímabilsins 3. ágúst 2020 til 29. júlí 2021. Úthlutun er tveir mánuðir í senn en stjórnarnefnd er ekki heimilt að úthluta íbúðinni í skemmri tíma. Sótt er um dvöl í Kjarvalsstofu á Rafrænni Reykjavík.  Með umsókn þurfa eingöngu að fylgja gögn sem umsækjandi telur að styðji umsóknina. Stjórnarnefnd Kjarvalsstofu fer yfir umsóknirnar og tekur ákvörðun um hverjir hljóta úthlutun. Einnig eru valdir varamenn úr hópi umsækjenda. Stjórnin getur ákveðið að úthluta ekki öllum tímabilunum komi sérstakar aðstæður upp. Öllum umsækjendum er svarað um leið og úthlutun hefur verið ákveðin.

Ætlast er til að dvalargestir skili inn stuttri greinargerð til stjórnar Kjarvalsstofu þar sem fram komi lýsing á unnu verkefni og afrakstri dvalarinnar.

Hvað kostar þjónustan?

Á árinu 2020 er leiguverð 1.138 evrur fyrir tveggja mánaða dvöl fyrir einstakling, en leigan hækkar í kringum 3% um hver áramót. Ýmis önnur gjöld geta bæst við, til dæmis ef fleiri gestir dvelja í íbúðinni. Sjá nánar í verðlista hér til hægri á síðunni. Einnig skulu tilvonandi íbúar greiða fyrirfram tryggingargjald sem jafngildir eins mánaðar dvalargjaldi en það endurgreiðist við brottför ef vinnustofan er yfirgefin í góðu ástandi.

Fyrirspurnir og/eða ábendingar

Vinsamlegast sendið fyrirspurnir og ábendingar varðandi Kjarvalsstofu í París til Ingu Maríu Leifsdóttur, verkefnastjóra á skrifstofu menningar- og ferðamálasviðs, í síma 411 6020 eða gegnum netfangið inga.maria.leifsdottir@reykjavik.is.

WP2Social Auto Publish Powered By : XYZScripts.com