Refresh

Re-Fresh – sýningaropnun í Harbinger laugardaginn 23.mars kl.17

Sindri Leifsson / Vala Sigþrúðar Jónsdóttir
Re-Fresh

Laugardaginn 23. mars klukkan 17 opnar sýningin Re-Fresh eftir Sindra Leifsson og Völu Sigþrúðar Jónsdóttur í Harbinger, Freyjugötu 1. 

Á sýningunni er ferlið Endurnýjun eða “refresh” rannsakað á hversdagslegan og veraldlegan hátt. Hugmyndir um endurnýjun óma nánast allstaðar.  Einn dagur tekur við af öðrum, vetur tekur við af hausti og nýja árið tekur við með áramótaheitum með von um endurnýjun og breytingar. Allt endurtekur og endurnýjar sig. Við endurræsum tölvuna, þvoum þvottinn okkar og ákveðum jafnvel að fasta í þeim tilgangi að hreinsa meltingarfærin svo þau virki eins og ný. Þörfin fyrir að “refresh-a” er manninum eðlislæg – þráin eftir því að byrja uppá nýtt, með óskrifað blað. 

Listamennirnir notast við sítrónur, kusk úr þvottavélum og lyktina af fersku viðarpússi í skúlptúrum sínum og ljósmyndum. Þeir hafa gengið svo langt að slá hvorn annan utan undir til þess eins að sjá húð sína endurnýjast. Hvar og hvenær er augnablikið þar sem eitthvað er nýtt en hættir því svo og byrjar að vera gamalt? Hvað þarf að eiga sér stað til að það verði aftur nýtt eða þá alveg eins og nýtt?   

Vala er að vinna verk út efnalaugarkuski og hefur því verið tíður gestur í efnalaug í hverfinu. Eins og hún lýsir því: “Efnalaugin í hverfinu er sem sagt búin að vera mjög tilkippileg í öllu þessu ferli. Eftir að ég fékk þennan áhuga á smátrefjum í haust hafa þau safnað fyrir mig kuskinu sínu sem ég sæki til þeirra vikulega. Þetta fyrirkomulag er okkur öllum orðið svo kunnugt að þegar ég geng inn um dyrnar er stundum kallað inn “kuskkonan er komin!” Og þá skutlast fram poki með marglitum lögum af kuski. Konan sem afgreiðir mig virðist fegin að þetta hráefni nýtist þar sem þetta færi annars beint í óflokkað rusl, kannski róa þessi skipti alheimskvíðann í okkur báðum.”

Um listamennina:

Sindri Leifsson (f. 1988) vinnur með áþreifanleg efni fyrir skúlptúra og innsetningar sem verða jafnan til í gegnum sjónarhorn gjörninga. Hann vekur upp spurningar um alræði vinnunnar og afurðanna sem til verða með áherslu á ferlið sjálft. Sindri Leifsson lauk MFA gráðu frá Listaháskólanum í Malmö, Svíþjóð árið 2013 og BA námi frá Listaháskóla Íslands árið 2011. Hann hefur verið virkur í sýningarhaldi og haldið einka- og samsýningar á Íslandi og víðsvegar erlendis.

Vala Sigþrúðar Jónsdóttir (f. 1993) er myndlistarmaður sem býr og vinnur í Reykjavík. Í list sinni veltir hún fyrir sér hvað telst náttúrulegt, og hvort manngerð tækni hafi á einhvern hátt tök á að gera því sem við köllum náttúru skil í máli og myndum. Vala lauk BA gráðu í myndlist frá Gerrit Rietveld Academie í Amsterdam síðastliðið vor, og lagði áður stund á nám við Textíldeild Myndlistaskólans í Reykjavík. Hún hefur tekið þátt í sýningahaldi á Íslandi og erlendis, og starfrækir umræðuhópinn Show and Tell.

Sýningin Re-Fresh er þriðja sýning af sýningaröðinni Rólegt og Rómantískt sem samanstendur af sex sýningum á sex mánuðum í Harbinger fyrri hluta árs 2019. Sýningarröðinni er stýrt af Kristínu Helgu Ríkharðsdóttur, Rúnari Erni Marinósson, Unu Björg Magnúsdóttur og Veigari Ölni Gunnarsson. 

Rólegt og Rómantískt er styrkt af Myndlistarsjóði og Myndstef. Harbinger er styrkt af Reykjavíkurborg.

Harbinger er virkt listamannarekið sýningarrými sem hefur fest sig í sessi síðustu þrjú ár í listalífi Reykjavíkur. 

WP2FB Auto Publish Powered By : XYZScripts.com