KONICA MINOLTA DIGITAL CAMERA

Myndverkasýning Ingibjargar Huldar Halldórsdóttur í Gerðubergi

Borgarbókasafnið | Menningarhús Gerðubergi
Laugardaginn 19. nóvember kl. 14
Skömmin er svo lík mér er yfirskrift myndverkasýning með verkum Ingibjargar Huldar Halldórsdóttur sem opnar laugardaginn 19. nóvember kl. 14 í Gerðubergi. Á sýningunni má sjá stór olíuverk, minni krosssaumsverk, silkiþrykksmyndir og teikningar.

Viðfangsefni sýningarinnar eru skuggahliðar persónuleikans, faldar tilfinningar, skömm og tabú. Á sýningunni er hægt að horfast í augu við óþægilegar tilfinningar sem við reynum að halda niðri í daglegu lífi. Sýningin er margslungin og tekst á við viðfangsefnið á marga vegu, en öll eiga verkin það sameiginlegt að hafa grímuna sem viðfangsefni. Gríman skýlir persónuleikanum, er margbreytileg og sýnir líðan þess er hana ber.

Skörp form, óhefðbundnar litasamsetningar og nákvæmt handverk fanga athygli áhorfandans og velta upp ótal spurningum um mig og þig – og skuggana okkar.

Myndlistamaðurinn Ingibjörg Huld Halldórsdóttir er fædd og uppalin í Borgarfirði. Hún lærði arkitektúr í Kaupmannahöfn og Lyon, Frakklandi og hefur unnið sem arkitekt og hönnuður samhliða listsköpun. Hún hefur bæði tekið þátt í einka- og samsýningum erlendis. Sýningin í Gerðubergi er fyrsta einkasýning Ingibjargar hér á landi.

Sýningin fékk verkefnastyrk Myndstefs í ár.

Sýningin stendur yfir frá 19. nóvember til 9. janúar og er opin alla virka daga frá kl. 9 – 18 og um helgar frá kl. 13 – 16.

WP2Social Auto Publish Powered By : XYZScripts.com