12017582 959065827482826 1749397200427015943 O

MÖRK – Ný sýning í Listasafni Árnesinga

MÖRK

Ný sýning í Listasafni Árnesinga verður opnuð laugardaginn 24. október kl. 14

Á sýningunni Mörk má sjá verk eftir myndlistarmennina Eygló Harðardóttur, Jónu Hlíf Halldórsdóttur, Karlottu Blöndal og Ólöfu Helgu Helgadóttur. Heiti sýningarinnar hefur jafn margar og ólíkar tilvísanir sem verkin en ein tilvísunin er í skóginn, sem leggur grunn að pappírsgerð, en það er efni allra verkanna á sýningunni. Heitið getur líka þýtt einskonar línu eða þröskuld sem þær sem skapendur og við sem áhorfendur ýtum á eða yfirstígum. En þó að efniviður verkanna sé pappír þá er hann af ýmsum gerðum og úrvinnslan margbreytileg. Eygló höfðar til tilfinninga í sínum verkum með litum og formgerð, Jóna Hlíf vinnur með beinskeittar samfélagslegar tilvísanir, Karlotta leggur fram óræð stór vatnslitaverk og Ólöf Helga glæðir verk sín skemmtilegum gáska. Verkin sem ýmist eru tvívíð eða þrívíð skapa áhugavert samtal og samhengi sín á milli og koma á óvart.

Listamennirnir verða til staðar á opnuninni sem er öllum opin og á degi myndlistar, laugardaginn 31. október verður Jóna Hlíf með listamannsspjall á sýningunni. Efnt verður til fleiri leiðsagna og listasmiðja meðan á sýningunni stendur sem er þar til safninu er lokað þann 14. des. en heldur síðan áfram á nýju ári til 21. febrúar.

Safnið er opið fimmtudaga til sunnudaga kl. 12 – 18 og aðgangur er ókeypis.

 

 

WP2Social Auto Publish Powered By : XYZScripts.com