Steingrímur Eyfjörð

Megi þá helvítis byltingin lifa: Steingrímur Eyfjörð

Megi þá helvítis byltingin lifa – Steingrímur Eyfjörð sýningaropnun 30. mars kl 16.00 í Hverfisgallerí

Megi þá helvítis byltingin lifa er titill annarrar einkasýningar Steingríms Eyfjörð hjá Hverfisgalleríi sem opnar næstkomandi laugardag, 30. mars kl. 16.00. Sýningar Steingríms Eyfjörð skera sig úr vegna þess að þar er ávallt varpað fram mörgum og stundum ósamrýmanlegum svörum við spurningum. Listmaðurinn veltir fyrir sér vandamálum og viðfangsefnum og leitast við að skoða þau frá ýmsum sjónarhornum. Oft leitar hann til annarra um álit, vitnar í aðra og fær jafnvel aðstoð miðla til að fá þátttakendur „að handan“ inn í samræðuna. Þegar þessi háttur er hafður á kemur í ljós að jafnvel hversdagslegir hlutir horfa ólíkt við eftir sjónarhorni hvers og eins.

Í aðdraganda sýningarinnar Megi þá helvítis byltingin lifa leitaði Steingrímur Eyfjörð til Ágústu Sigurfinnsdóttur spámiðils sem miðlaði m.a. eftirfarandi: “Tölurnar 3, 6 og 9 birtast sterkt og má túlka sem annað hvort fjölda verka eða númer þeirra sem fara. Summa þeirra er 18 og því er endanlega niðurstaða 9. Verk númer 9 stendur upp úr. Gríman kemur því sterk inn og er hún á verkum 6 og 9. Þrír verða spenntir, tveir verða móðgaðir og einn æstur. Hann kaupir. Á hring getur endapunktur einnig verið byrjun. Er þetta endir á einhverju og byrjun á einhverju öðru?

Nei. En þú færð skilaboð, bréf eða símtal um verkin frá einhverjum þeim tengdum. Einn missir glas úr höndunum á sér. Í vinstra horninu nær þegar gengið er inn í salinn. Áhrifin verða töluverð. Tvíbent. Jákvæð. Sumir stara í forundran. Þekkt er að hundar gelti að því sem þeir þekkja ekki. Margir hafa varðhund í höfðinu á sér sem varar þá við hugsanlegum aðsteðjandi hættum, eins og nýjum hugmyndum. Nýmælum hefur oft verið mætt með gjammi og glefsum. Þeir varðhundar hafa þó lítil áhrif á heildarmyndina. Listamenn þurfa ekki að matreiða hugmyndir sínar þannig að þær renni vel ofan í hvaða hundskjaft sem er. Leiddu geltið hjá þér. […] Veröldin tjáir sig með mynstrum. Allt er stöðugt að breytast. Er einhver fegurð í núverandi stöðu, í óreiðunni? Ef horft er til baka má sjá hvað hefur breyst og hvaða mynstur leiddu hingað. Hvaða áhrif hefur einstaklingurinn á stöðuna? Horfðu inn á við, þá muntu sjá það sem alltaf hefur verið hulið. Það var þarna allan tímann. Samviska, hugmyndir, umbreyting og heilun. Kali birtist aftur til að kveðja, í kringum hana hringsnúast dansarar. Smágerðar bjöllur um ökkla þeirra undirleikurinn. Til þess að eitthvað nýtt geti átt sér stað þarf að ryðja úr vegi því sem fyrir er Steingrímur Eyfjörð (f. 1954) er meðal hinna fremstu í þeirri kynslóð íslenskra listamanna sem fram kom á áttunda áratugi síðustu aldar. Í vinnu sinni nýtir hann sér fjölbreytta miðla, þar á meðal ljósmyndun, teiknimyndir, myndbönd, málun, skúlptúra, gjörningalist, skrif og innsetningar.

Efnisvalið er álíka fjölbreytt; hann sækir innblástur í jafn ólíkar áttir og þjóðsögur, Íslendingasögur, tískutímarit, trúarbrögð, hjátrú, krítíska teoríu og margs konar annað efni úr samtímanum, í meðförum hans skarast þau á margræðum tengipunktum þannig að úr verða marglaga verk, á stundum rugla þau mann í ríminu en í þeim birtist ævinlega skýr og óvænt sýn á þau viðfangsefni sem unnið er með. Steingrímur var fulltrúi Íslands á Feneyjatvíæringnum árið 2007.

WP Facebook Auto Publish Powered By : XYZScripts.com