VilhjalmurUmMatthiasSigurhaedirNov20

Matthíasi nær – í tilefni af 100 ára ártíð Matthíasar Jochumssonar

Miðvikudaginn 18. nóvember eru eitt hundrað ár frá andláti Matthíasar Jochumssonar. Flóra menningarhús hefur með stuðningi Menningasjóðs Akureyrar látið gera myndskeið þar sem Vilhjálmur B. Bragason fer á kostum í umfjöllun um Matthías sem leikritaskáld og þýðanda. Matthías er nefninlega ekki bara þjóðskáldið okkar, höfundur þjóðsöngsins auk þess að hafa verið prestur Akureyringa, heldur var hann svo margt fleira. Hann var stórbrotinn persónuleiki, heimsborgari, frjálslyndur, umdeildur og mikilvægur í þjóðmálaumræðu Íslendinga áratugina í kringum 1900. En Matthías var einnig áhrifaríkur í nærsamfélaginu og mótandi persónuleiki í samfélagsþróun Akureyrar á þeim tíma og fólksins í kringum hann. Myndskeiðið var tekið upp á degi íslenskrar tungu sl mánudag í Sigurhæðum á Akureyri, húsi Matthíasar og Guðrúnar. Því verður miðlað á youtube, facebook og instagram frá og með miðvikudeginum 18. nóvember nk.

Í undirbúningi er annað myndskeið í svipuðum dúr og mun það birtast í byrjun desembermánaðar. Þórunn Jarla Valdimarsdóttir fjallar þar á sinn einstaka hátt um Matthías sem jafnræðissinna og talsmann kvenfrelsis.

Með þessum myndskeiðum og samstarfi við frábært samtímalistafólk okkar vill Flóra menningarhús stuðla að því að efla ritlist norðan heiða og um land allt, en markmiðið er einnig að auka samtal og þekkingu um líf og verk norðlensks ritlistafólks.

Nánari upplýsingar veitir Kristín hjá Flóru menningarhúsi í s 6610207 og flora.akureyri@gmail.com

WP2Social Auto Publish Powered By : XYZScripts.com