LISTASAFN SIGURJÓNS ÓLAFSSONAR: EINAR FALUR INGÓLFSSON HELDUR FYRIRLESTUR Í TENGSLUM VIÐ SÝNINGUNA „LISTAMAÐUR Á SÖGUSLÓÐUM“

 

Einar Falur Ingólfsson heldur fyrirlestur í Listasafni Sigurjóns Ólafssonar sunnudaginn 15. febrúar kl. 15:00

Sýningin Listamaður á söguslóðum var opnuð í Listasafni Sigurjóns Ólafssonar 31. janúar síðastliðinn. Þar má sjá teikningar frá íslandsferðum danska listmálarans Johannesar Larsen sumrin 1927 og 30, en teikningar hans af sögustöðum á Íslandi birtust í danskri útgáfu Íslendingasagna árið 1930.

Í tengslum við sýninguna mun Einar Falur Ingólfsson halda fyrirlestur í safninu næsta sunnudag kl. 15 sem hann nefnir Sýn á sögustaði. Þar fjallar hann um sýn tveggja listamanna, bretans William Gershom Collingwood (1854-1932) og Johannesar Larsen (1867-1961) á staði sem koma fyrir í Íslendingasögunum. Collingwood ferðaðist um Ísland sumarið 1897 og málaði vatnslitamyndir, en Johannes Larsen teiknaði sínar myndir sumrin 1927 og 1930. Sem þrautþjálfaðir listamenn nálguðust þeir myndefnið á sinn persónulega hátt með hliðsjón af sögunum. Einar Falur bregður upp myndum sem listamennirnir unnu hér, í mörgum tilvikum á sömu stöðum, og sýnir eigin ljósmyndir.

Einar Falur sendi árið 2010 frá sér bókina Sögustaðir – í fótspor W.G. Collingwood, sem tilnefnd var til Íslensku bókmenntaverðlaunanna, og þá hefur sýning með verkum hans og  Collingwood verið sett upp í Þjóðminjasafni Íslands, Scandinavia House í New York og víðar. Hann vinnur nú að verkefni sem tengist teikningum Johannesar Larsen.

WP2Social Auto Publish Powered By : XYZScripts.com