Listasafnreykjavíkur

Listasafn Reykjavíkur: Opið fyrir umsóknir í D-sal Hafnarhúss

Listasafn Reykjavíkur auglýsir eftir umsóknum listamanna til að sýna í D-sal Hafnarhússins árið 2021.

Þetta fyrirkomulag á vali listamanna í sýningarröðinni var tekið upp árið 2018 með það að markmiði að gefa listamönnum með skamman feril að baki tækifæri til að beina athygli að listsköpun sinni.

Árið 2018 bárust safninu yfir 130 umsóknir. Fjórir listamenn voru valdir til þess að sýna árið 2019 og fjórir sýna í ár, 2020.

Sýningarröðin í D-sal Hafnarhússins hóf göngu sína árið 2007 og þar hafa nú fjörutíu listamenn sýnt verk sín. Á sýningunum eru kynntir til leiks listamenn sem hafa sterka og persónulega listræna sýn en hafa ekki áður haldið einkasýningu í opinberu safni.

Í D-sal gefst listamönnum tækifæri til að kynnast af eigin raun þeim innviðum sem opinbert listasafn styðst við í starfsemi sinni. Um leið opnast gestum safnsins innsýn í nýjar stefnur og strauma í samtímalist.

Við val á listamönnum til sýninga í D-sal er gerð sú krafa að þeir hafi ekki áður haldið einkasýningu í opinberu listasafni en hafi tengsl við íslenskt listalíf í gegnum nám, sýningar og/eða búsetu á Íslandi.

Með umsókninni skal fylgja ferilskrá ásamt stuttri lýsingu á inntaki og efnistökum sem viðkomandi hyggst vinna út frá á fyrirhugaðri sýningu (hámark 250 orð). Að auki fimm ljósmyndir af fyrri verkum. Sérskipuð dómnefnd velur úr umsóknum.

Umsóknir berist fyrir lok dags, 25. febrúar 2020 á netfangið listasafn@reykjavik.is merktar „D-2021“. Fyrirspurnir berist á sama netfang.

WP2Social Auto Publish Powered By : XYZScripts.com