Listasafn Alþýðu Kall Eftir Tillögum. Ljósmynd Rögnvaldur Óskarsson 002

Listasafn ASÍ kallar á ný eftir tillögum frá listamönnum

27. maí 2019 – Listasafn ASÍ auglýsir eftir tillögum frá listafólki sem vill sýna á tveimur stöðum á landinu á vegum safnsins á næsta ári 2020.  Auk sýninganna kaupir safnið verk af þeim sem fyrir valinu verður. Listráð safnsins fer yfir allar tillögur og velur listamann/listhóp til samvinnu um sýningar og til að kaupa af verk fyrir allt að 2 milljónir króna.  Þetta er þriðja árið í röð sem safnið kallar eftir tillögum frá listafólki í þessum tilgangi.  

Safnið stendur straum af öllu sem viðkemur sýningarstaðnum, flutningaskostnaði, tryggingum, vinnu listamannsins, ferðum og uppihaldi.  Vinna listamannsins felst m.a. í uppsetningu sýninganna, listamannaspjalli, leiðsögn og móttöku skólahópa.  Greiðslur taka mið af Framlagssamningi SÍM frá 2015. Ekki verður um að ræða greiðslu fyrir framleiðslukostnað listaverka fyrir sýningarnar (að undanskildum efnisstyrk þar sem það á við) og verkin verða áfram í eigu viðkomandi að undanskildum þeim sem safnið kaupir.

Áhugasamir er beðnir um að senda tillögur sínar á netfangið listasi@centrum.is eigi síðar en á miðnætti mánudaginn 1. júlí  2019.  Umsóknir skulu innihalda eftirtalin fylgigögn (þ.e. fylgiskjöl með tölvupósti – vinsamlegast sendið fylgigögnin í einni möppu eða möppum merktri/merktum nafni viðkomandi): 

  1. Ferilskrá – þ.m.t. upplýsingar um nafn, kennitölu, heimilisfang, símanúmer og netfang.
  2. Hugleiðing/þankar – hámark 500 orð.
  3. Sýnishorn af allt að 5 verkum sem gætu komið til greina með stuttum skýringartexta fyrir hvert verk (hámark 200 orð hver). Ath. virða ber hámarksfjölda verka. Hafa ber innkaupastefnu safnsins í huga (sjá hér að neðan).

Opnað fyrir umsóknir:       28. maí 2019

Skilafrestur tillagna:            1. júlí 2019

Niðurstöður kynntar:         Fyrir lok ágúst 2019

ljósmynd: Rögnvaldur Óskarsson

Listasafn ASÍ vinnur þessi misserin að því að koma upp nýjum sýningarsal fyrir sýningar safnsins.  Samhliða þeirri vinnu er unnið eftir áætlun til fimm ára (2017-2021) þar sem lögð er áhersla á að kaupa ný verk markvisst inn í safneignina og efla sýningarhald í samstarfi við aðrar stofnanir og samtök víða um land.  M.a. er skipulögð er tvíhliða sýningardagskrá, annars vegar sýningar á nýjum verkum samtímalistafólks og hins vegar kynning á eldri verkum í safneigninni, en þar er notast við krafta listafólks á ýmsum sviðum.  Lögð er sérstök áhersla á samvinnu við skóla í þeim landshluta eða bæjarfélagi sem sýningarnar fara fram. 

Innkaupastefna Listasafns ASÍ – Innkaupastefna safnsins tekur mið af því menntunar- og miðlunarátaki sem safnið hefur nú ráðist í með sýningarhaldi víða um land.  Valin verða og keypt inn ný verk þar sem viðfangsefni og/eða miðill endurspeglar tíðarandann með afgerandi hætti.    

Listráð Listasafns ASÍ – Listráð Listasafns ASÍ 2019-20 skipa sýningarstjórarnir Dorothée Kirch og Heiðar Kári Rannversson ásamt safnstjóra Elísabetu Gunnarsdóttur sem jafnframt er formaður.  Listráðið er skipað til tveggja ára í senn og er rekstrarstjórn safnsins til ráðuneytis um innkaupastefnu og val á listafólki.

Listasafn ASÍ var stofnað árið 1961. Iðnrekandinn og bókaútgefandinn Ragnar Jónsson í Smára lagði grundvöllinn að listasafninu með því að gefa ASÍ málverkasafn sitt – um 120 myndir – eftir marga af þekktustu myndlistarmönnum þjóðarinnar. Ósk Ragnars var sú að stofnað yrði listasafn sem kæmi listinni á framfæri við vinnandi fólk í landinu. Listasafn ASÍ hefur alla tíð starfað með þetta að leiðarljósi og hefur m.a. sérhæft sig í myndlistarsýningum sem settar eru upp á vinnustöðum og í stofnunum víða um land.  Safnið hefur vaxið jafnt og þétt frá stofnun þess fyrir tæpum sextíu árum og geymir nú rúmlega 4000 verk.

Frekari upplýsingar veitir:

Elísabet Gunnarsdóttir safnstjóri Listasafns ASÍ

Guðrúnartúni 1 105 Reykjavík

+354 868 1845 og listasi@centrum.is

www.listasafnasi.is

WP2Social Auto Publish Powered By : XYZScripts.com