Listasafn árnesinga Logo

Listasafn Árnesinga: TOHOKU – með augum japanskra ljósmyndara

Sýningaropnun – laugardaginn 1.febrúar 2020 kl.14

Í Listasafni Árnesinga – Inga kveður og Kristín heilsar

Listasafn Árnesinga opnar dyrnar á nýju ári með ljósmyndasýningu. Þar má sjá verk eftir níu japanska ljósmyndara og ljósmyndahóp, sem allir eru virtir og vel kynntir í sínu heimalandi sem utanlands. Sýningin er unnin að frumkvæði Japan Foundation sem fól einum fremsta ljósmyndagagnrýnanda landsins, Kotaro Iizawa, sýningarstjórnina. Viðfangsefnið var að endurspegla lífið og menninguna í TOHOKU í fortíð, nútíð og jafnvel framtíð, með augum ljósmyndunar, sem mótvægi við þær ljósmyndir sem fóru um heim allan í kjölfar hörmunganna vegna stóra jarðskjálftans 2011. Tohoku er jaðarsvæði á norðaustur hluta eyjarinnar Honsu sem er stærsta eyja Japans. Svæðið er búið einstökum og ríkulegum náttúruauðlindum þannig að landbúnaður, fiskveiðar og skógarhögg  blómstrar þar, en þrátt fyrir náttúrugæði sín markast saga Tohoku einnig af erfiðri lífsbaráttu.

Ljósmyndarnir eru allir fæddir í Tohoku á árunum 1917 – 1974 og endurspegla því mismunandi tíma, stíla og sjónarhorn. Sýningin hefur verið á ferð um heiminn frá árinu 2012 og ánægjulegt að fá tækifæri til þess að kynna hana hér á landi því þó margt sé ólíkt milli þessara tveggja þjóða, Japan og Íslands, þá er ýmislegt sem sameinar eylöndin tvö, svo sem jarðskjálftar, eldfjöll, heitir hverir og fiskveiðar.

Sýningin er sett upp í Listasafni Árnesinga í samvinnu við Sendiráð Japans á Íslandi og sendiherrann herra Yasuhiko Kitagawa mun opna sýninguna. Á sýningartímanum verður einnig fengist við japanska menningu svo sem origami og kalligrafíu í fjölskyldusmiðjum safnsins.

Við opnun sýningarinnar mun Inga Jónsdóttir kveðja sem safnstjóri og kynna Kristínu Scheving sem tekur við frá og með 1. febrúar. Það væri því gaman að sjá sem flesta við þessi tímamót og eiga saman stund í safninu.

Aðgangur er ókeypis og sýningin mun standa til 22. mars. Einnig stendur sýningin Tilvist og Thoreau með verkum eftir Hildi Hákonardóttur, Elínu Gunnlaugsdóttur og Evu Bjarnadóttur áfram frá fyrra ári.

WP2Social Auto Publish Powered By : XYZScripts.com