Birgir Snæbjörn Birgisson

Listasafn Árnesinga: spjall, leiðsögn, vetrarfrí og afmæli

Spjall um verkið Von með Birgi og leiðsögn um sýninguna Halldór Einarsson í ljósi samtímans

Sunnudaginn 21. október kl. 15:00 mun listamaðurinn Birgir Snæjörn Birgisson spjalla við gesti um verk sitt Von sem samanstendur af 64 máluðum portrettum af þeim alþingismönnum sem kosnir voru á þing vorið 2013. Von kallast á við verk Halldórs Einarssonar af alþingismönnum lýðveldisársins 1944 sem hann skar í tré. Þessi tvö verk og mörg fleiri má sjá á sýningunni Halldór Einarsson í ljósi samtímans sem nú stendur í Listasafni Árnesinga. Auk þess að bjóða upp á samtal við Birgi mun Inga Jónsdóttir safnstjóri ganga um sýninguna, segja frá og svara spurningum gesta.

Með sýningunni er Listasafn Árnesinga að rýna í menningararfinn og lætur verk fjögurra núlifandi listamanna eiga í samtali við og varpa nýju ljósi á verk Halldórs á aldarafmæli fullveldis Íslands. Halldór Einarsson fæddist árið 1893 í Brandshúsum í Flóa. Hann lærði tréskurð og teikningu hjá Stefáni Eiríkssyni, en flutti árið 1922 til Vesturheims og starfaði lengst af við tréskurð í húsgagnaverksmiðju í Chicago. Meðfram þeirri vinnu skapaði hann mikinn fjölda verka í tré, stein og önnur efni. Eftir 45 ár ytra flutti Halldór aftur til Íslands og gaf Árnessýslu verk sín ásamt peningagjöf og var það önnur tveggja stofngjafa Listasafns Árnesinga, sem fagnar 55 ára afmæli þann 19. október n.k. Á sýningunni myndast óvæntar tengingar í ýmsar áttir, frá húsgögnum til bóka, handverki til náttúru, lækninga til stjórnmála, valdi til kvenna.

Birgir Snæbjörn Birgisson er fæddur árið 1966 og nam myndlist á Íslandi og í Frakklandi. Hann bjó líka um tíma í London þar sem hann starfaði við myndlist. Hann býr nú í Reykjavík en er virkur í sýningarhaldi víða um heim. Í verkum Birgis er að finna samfélagslega og pólitíska skírskotun og hann hefur lengi unnið með staðalímyndir út frá norrænu yfirbragði. Í verkinu Von er hann sjálfum sér trúr þegar hann málar alla alþingismennina ljóshærða og bláeygða, en það er hvers og eins að túlka hvað það þýðir. Á sunnudaginn gefst tækifæri til þess að ræða við Birgi, spyrja og ræða ólíkar túlkanir auk þess að fara í eins konar ratleik við það að greina þekkjanleg andlit í hópnum. Verkið ber í eigu Listasafns Íslands.

Vetrarfrísdaga skólanna 18. – 21. október býður Listasafn Árnesinga börnum og fjölskyldum þeirra að heimsækja safnið og taka þátt í ýmsu sem þar er á dagskrá. Boðið er upp á fjársjóðs spurningarleik í tengslum við sýningar safnsins. Leikurinn er með þeim hætti að börn og fullorðnir ganga saman um sýningarrýmið og leita að svörum við laufléttum spurningum fjársjóðsratleiksins. Svörunum er síðan komið fyrir í fjársjóðskistu sem í lok dags 21. október verður opnuð, einn heppinn þátttakandi dreginn út og fær sá fjársjóðspakka að launum, en allir þátttakendur fá einnig glaðning að launum. Í barna- og fjölskyldukróknum verður líka sjálfbær smiðja þar sem leiðbeiningar liggja frammi hvernig búa á til popp-upp fjársjóðskort. Allt efni sem þarf er þar til staðar þátttakendum að kostaðarlausu. Í fjölskyldukróknum er einnig leir til að móta eitt og annað skemmtilegt, teikniblöð og ýmis teikniáhöld.

Sýningin Halldór Einarsson í ljósi samtímans hefur verið framlengd til 16. desember nk og sýningin Frá mótun til muna til 28. október. Safnið er safnið opið fimmtudaga – sunnudaga kl. 12-18. Aðgangur að safninu er ókeypis og allir velkomnir. Boðið verður upp á kaffi og konfekt á afmælisdaginn 19. okt.

WP Facebook Auto Publish Powered By : XYZScripts.com