Synjun

Listamannaspjall í Hallgrímskirkju

SYNJUN / REFUSAL

Listamannaspjall á sunnudegi

Kristín Reynisdóttir

Í Hallgrímskirkju

Sunnudaginn 6. maí kl. 17:00 býður Listvinafélag Hallgrímskirkju til listamannaspjalls í Hallgrímskirkju í tengslum við sýningu Kristínar Reynisdóttur, SYNJUN / REFUSAL. Kristín mun ræða um sýninguna og svara fyrirspurnum gesta. Prodhi Manisha, flóttamaður, sem er nýkominn með landvistarleyfi á Íslandi mun segja frá reynslu sinni. Rósa Gísladóttir sýningarstjóri og myndlistarmaður mun opna umræðurnar. Léttar veitingar verða í boði.

Eins og fram kemur í umfjöllun Guju Daggar Hauksdóttur í sýningarskrá vinnur Kristín með við, sem fenginn er úr ruslakompu trésmiðju og ber því á táknrænan hátt tilvísun í tilvistarlega stöðu flóttamanna, sem eru afgangs og aflóga á flótta sínum frá styrjöldum í heiminum. Viðurinn er í formi fínlegra og viðkvæmra lista af ýmsum tegundum trjáa, bæði harðvið og mjúkum við, dökku tré og ljósu, sem átt hefur rætur og vaxið hefur á ólíkum stöðum og við ólík skilyrði, en hefur á þessum tímapunkti skilað sér upp á Íslands strendur. Innsetning Kristínar í Hallgrímskirkju er auðmjúk og fínleg, en jafnframt margræð, þar sem hún ávarpar þann aukna straum flóttamanna sem verið hefur að undanförnu til Íslands, og þeirri miskunnarlausu ákörðum stjórnvalda að vísa meirihluta þeirra af hörku aftur úr landi.

Kristín Reynisdóttir (f. 1961) stundaði nám sitt, fyrst við Myndlista- og handíðaskóla Íslands (1983-1987) og síðan við Staatlische Kunstakademie Düsseldorf í Þýskalandi (1987-1989). Verk Kristínar Reynisdóttur einkennast af sambærilegum jafnvægisgangi á milli hins fínlega, margræða, gegnsæja og viðkvæma, og sterkra tifinninga og sannfæringarkrafts, eins og sjá má af heitum sérsýninga hennar allt frá upphafi: Strengir, Viðkoma, Ferðalag, Fellingar og Til staðar. Hin síðari ár hefur Kristín tengst öðrum myndlistarmönnum með snertiflöt við Norðurlöndin og hafið næst löndum Norður-Evrópu, sem sett hafa upp samsýningar á grundvelli listrænnar sköpunar með grunn í heimspekilegri afstöðu á tilvistarleg skilyrði lífs á norrænum slóðum. Meðal verka hennar á þeim vettvangi eru I Vesterveg – Netja og Red Snow – Ice in Motion, sýningar sem ferðast hafa víða um norðurhjara veraldar, auk Behind the North Wind – Hjarta í Bonhoga Gallery á Shetlandseyjum og Hverfing – Hryggjarsúla í Verksmiðjunni á Hjalteyri. Verk Kristínar eru gjarnan innsetningar í rými, sem gera hvort tveggja; að ávarpa þann sérstaka stað sem þau eru sett inn í og velta upp sammannlegum þáttum með tilvísanir í upplifanir og tilfinningar. Kristín velur hráefnið í verk sín með tilliti til merkingarberandi eiginleika þeirra. Þannig hefur hún unnið með jafn ólík efni og plexigler og tré, plastefni í sterkum lit og netju (lífhimnu) úr kind, auk þess að spila með dagsbirtuna, skuggavarp og myrkur sem meðleikara í myndbirtingu og upplifun verka sinna.

Sýningin í Hallgrímskirkju stendur til 13. maí 2018.

listvinafelag.is

WP2Social Auto Publish Powered By : XYZScripts.com