GalleryPort

Listamannaspjall í dag kl.17 – Birta Guðjónsdóttir ræðir við Hrafn Jónsson – í Gallery Porti

LIST ÁN LANDAMÆRA 2020

Listamannaspjall í dag, fimmtudaginn 12. nóvember, kl.17:00.

LISTAMANNSSPJALL Í DAG VIÐ HRAFN JÓNSSON-KRUMMA

FIMMTUDAGINN 12. NÓVEMBER KL. 17:00.

GALLERY PORTI, LAUGAVEGI 23b

Hrafn Jónsson-Krummi, myndlistarmaður og Birta Guðjónsdóttir, listrænn stjórnandi Listar án landamæra 2020, ætla að taka á móti gestum í Gallery Porti í dag, fimmtudaginn 12. nóvember kl. 17:00, og spjalla um einkasýningu Krumma. Í dag er síðasti dagur sýningar Hrafns; Skrölt III.

Hrafn Jónsson – Krummi. Ljósmynd: Hrafn Jónsson

Sýning Hrafns er hluti af List án landamæra 2020. www.listin.is

Við fylgjum öllum reglum um sóttvarnir, undir 10 manns í einu í salnum, engir snertifletir og erum með grímur og spritt.

Aðgengi er sæmilegt, ekki er aðgengilegt salerni á staðnum, blátt bílastæði er nálægt húsi.

Birta Guðjónsdóttir. Ljósmynd: Hrafn Jónsson

SKRÖLT III er einkasýning Hrafns Hólmfríðarsonar Jónssonar (Krumma),
myndlistarmanns sem vinnur með ljósmyndir. Sýningin fer fram á vegum
listahátíðarinnar List án landamæra.

Ljósmyndirnar í SKRÖLT III eru teknar á tímabilinu milli mars og september árið 2020 og marka þær þriðja kafla ljósmyndaverksins SKRÖLT.
Um verk sín segir Hrafn: Á þessum skrýtnu tímum SKRÖLT-i ég áfram og raða flóknum, jafn vel ókunnugum tilfinningum og hugsunum í ljósmynd. Þessi óþekkta stemmning sem myndaðist í samkomubanninu var kveikjan að þessu verkefni og hefur knúið mig áfram í þessu litlausa ástandi sem ríkir. Mér fannst sú nálgun að nota mitt nærumhverfi sem “svið” liggja beint við þar sem ég og langflestir hafa tekist á við yfirstandandi faraldur í sínum afmarkaða radíus.

SKRÖLT er langtíma-ljósmyndaverkefni listamanns er tekur stöðugt ljósmyndir í öllum aðstæðum daglegs lífs og er með vélina á sér öllum stundum. Veigamestu þættir verkefnisins eru annarsvegar sú nálgun að upplifa lífið í gegnum ljósmyndalinsuna, á ánægjulegum svo og á krefjandi stundum, og hinsvegar að velja úr miklum fjölda mynda, þær sem fangað hafa örstundir er gestir sýningarinnar geta speglað sig og sína tilveru í, fengið annarskonar sýn á umhverfi sitt og mynstur í eigin lífi.
Þannig má líta á verkefnið sem heilandi og í senn sem listrænan óð til þeirrar undarlega flóknu tilveru sem við öll glímum við, með þau hlutverk helst að læra, vaxa, elska, byggja upp, bæta, skynja og miðla til annarra.

Hrafn hóf að fást við ljósmyndun sem leið til að takast á við upplifanir sínar sem fatlaður maður og endurspegla ljósmyndaverk hans persónulega, fagurlega uppbyggða og áhrifaríka nálgun hans á miðilinn; á ljósmyndina sem vettvang íhugunar og sem leið til að skilja sjálfan sig og heiminn.
Ljósmyndavélin er þannig stuðningsaðili listamannsins, gagnrýnandi hans og spegill á líf hans. Áminning fyrir hann og okkur öll um það að líf okkar er í kjarna sínum röð af hversdagslegum athöfnum, mynstrum sem við komum okkur upp, mynstrum sem við brjótum upp eða reynum að eyða með öðrum mynstrum.

Sýning Hrafns er áminning um að líf okkar endurspeglar það sem við aðhöfumst í endurtekningunni og þær ákvarðanir að brjóta hana upp af og til til aukins lærdóms og vaxtar.

Á þessari fyrstu einkasýningu Hrafns sýnir hann nýleg ljósmyndaverk. Þessi verk hafa ekki verið sýnd áður og eru mynduð í nánasta umhverfi listamannsins, í Reykjavík.

Ljósmyndaverk Hrafns hafa í tvígang verið sýnd sem hluti af samsýningum
Ljósmyndaskóla Reykjavíkur. Auk þess var Hrafn valinn sem þátttakandi í
alþjóðlegu ljósmyndakeppninni Blurring The Lines í París, sem átti sér stað fyrr á
þessu ári.

Verk hans Skrölt III, sem sjá má á sýningunni í Gallerí Porti, var
meðal þeirra 33 ljósmyndaverka er dómnefnd þessara virtu ljósmyndaverðlauna þótti bera af, en alls voru verk 151 ljósmyndara úr forvali send inn til keppninnar. Verkið verður birt í veglegri útgáfu á vegum keppninnar ásamt hinum 32 úrvalsverkunum en útgáfan verður kynnt sérstaklega á Paris Photo listamessunni, sem haldin verður um miðjan nóvember 2020.
Hrafn Jónsson hóf ljósmyndanám við Ljósmyndaskólann 2017 en tók námsleyfi í eitt ár vegna ljósmyndaverkefnis í Accra í Ghana.

Hér má hlusta á viðtal við Hrafn Jónsson og Birtu Guðjónsdóttur, listrænan stjórnanda Listar án landamæra, í Víðsjá á RÚV á dögunum:  https://www.ruv.is/frett/2020/11/08/ofatlad-folk-ser-hlutina-stundum-skakkt?fbclid=IwAR1UytxG1eI8i6kqk6MO_WVDeVeCgg7lNkNK5PzQfHHe66aN2FEgImTBjQs

www.krummijons.com
krummsi90@gmail.com

Sýning Hrafns í Gallerí Porti er sérstaklega styrkt af Myndlistarsjóði og
Reykjavíkurborg.

Sýningin er á vegum listahátíðarinnar List án landamæra, listahátíðar fatlaðra.
www.listin.is

List án landamæra 2020 er stutt af Mennta- og menningarmálaráðuneytinu,
Reykjavíkurborg og Öryrkjabandalaginu-ÖBÍ

List án Landamæra 2020
WP2Social Auto Publish Powered By : XYZScripts.com