Blom

Kristján og Loji umpotta – List án Landamæra í Listasal Mosfellsbæjar

Frá haustinu 2017 hafa listamennirnir Kristján Ellert Arason og Loji Höskuldsson unnið að verkum fyrir sýninguna Kristján og Loji umpotta. Þar sýna þeir ný útsaumsverk af blómum sem þeir hafa unnið í sameiningu. Listamennirnir hafa þó einungis hist tvisvar þessa átta mánuði sem þeir hafa unnið saman þar sem Loji er búsettur í Svíþjóð. Samvinnan hefur þó gengið prýðilega og hefur orðið að nokkurs konar leik. Þannig saumar annar út hluta myndarinnar, t.d. blómapottinn eða blómið, og sendir hinum, sem klárar myndina. Sá sem tekur við myndinni veit því ekki hverju hann á von á og sá sem sendir myndina veit ekki hvernig endanlegt útlit myndarinnar verður. Það er erfitt fyrir áhorfandann að sjá hvor hefur saumað hvaða part verksins en Kristján og Loji eru hálfgerðir listabræður. Báðir vinna þeir útsaumsverk á brúnan striga, listaval í verkum þeirra er svipað, þeir hafa óbilandi áhuga á mismunandi útsaumsaðferðum og sækja þeir innblástur sinn í nærumhverfi. Afrakstur samvinnunnar eru 13 nýjar plöntur sem fá að blómstra á hátíðinni List án landamæra í ár.

Kristján Ellert Arason er fæddur árið 1958. Fyrstu ár ævi sinnar ólst hann upp í Mosfellssveit en flutti síðar til Reykjavíkur. Hann hefur stundað nám við Stýrimannaskólann, Höfðaskóla og Öskjuhlíðarskóla. Síðustu níu árin hefur hann unnið að myndlist á vinnustofum Sólheima. Í list sinni hefur Kristján Ellert unnið mest með útsaum og hefur hann sýnt verk sín víða. Vandvirkni einkennir handbragð Kristjáns Ellerts, hann saumar út lítil varfærnisleg saumspor og vinnur lengi að hverri mynd.

Loji Höskuldsson fæddist árið 1987 í Reykjavík. Hann útskrifaðist úr myndlistardeild Listaháskóla Íslands árið 2010. Myndlist hans kannar hefðbundnar og nýjar leiðir í útsaumi, tækni sem hann hefur þróað út frá vinnu móður sinnar, sem er atvinnusaumakona og meistari í útsaumi. Loji hefur tekið þátt í fjölda samsýninga hér á landi og haldið einkasýningar. Viðfangsefni verka hans eru fengin úr hversdagsleikanum, svo sem plöntur og ávextir, og minna stundum á verk flæmsku meistaranna úr endurreisninni.

Sýningin Kristján og Loji umpotta er hluti af List án landamæra árið 2018. List án landamæra leggur áherslu á fjölbreytileika mannlífsins og var fyrst haldin árið 2003. Hátíðin fer fram um land allt og hefur vaxið og dafnað síðastliðin ár. Markmið hátíðarinnar er að auka gæði, gleði, aðgengi, fjölbreytni og jafnrétti í menningarlífinu. Hátíðin í gegnum árin hefur stuðlað að samstarfi á milli fatlaðra og ófatlaðra listamanna. Þannig er unnið þvert á ósýnileg landamæri. Nánari upplýsingar um hátíðina má finna á www.listin.is

Sýningin verður opnuð í Listasal Mosfellsbæjar 11. maí og stendur til 15. júní.
Aðgengi að salnum er gott og bílastæði eru nálægt.

WP2Social Auto Publish Powered By : XYZScripts.com