Capture

Íslensku Myndlistarverðlaunin 2018

Myndlistarráði er sönn ánægja að kynna Íslensku myndlistarverðlaunin.

Verðlaunin verða í fyrsta skipti afhent 22. febrúar næstkomandi og opnað var fyrir tilnefningar 20. desember síðastliðinn. Myndlistarráð stendur að verðlaununum sem hafa þann tilgang að vekja athygli á því sem vel er gert á sviði myndlistar á Íslandi.

Veitt verða verðlaun í tveimur flokkum: Myndlistarmaður ársins og Hvatningarverðlaun ársins. Aðalverðlaun, 1 milljón króna, verða veitt íslenskum myndlistarmanni eða myndlistarmanni með búsetu á Íslandi sem þykir hafa skarað framúr með nýlegum verkum og sýningu á Íslandi á síðastliðnu myndlistarári, 2017. Hvatningarverðlaun, 500 þúsund krónur, verða veitt ungum starfandi myndlistarmanni sem lokið hefur grunnnámi á síðastliðnum 5 árum og sýnt hefur opinberlega innan þess tíma.

Dómnefnd Myndlistarverðlauna Íslands er skipuð fulltrúum Listaháskóla Íslands, Listfræðafélagi Íslands, Myndlistarráði, safnstjóra íslenskra listasafna (Listasafn Íslands, Listasafnið á Akureyri, Listasafn Reykjavíkur, Gerðarsafn, Nýlistasafnið, Listasafn Árnesinga, Listasafn Reykjanesbæjar, Listasafn ASÍ) og Sambandi íslenskra myndlistarmanna.

Dómnefnd er skipuð til eins árs í senn og í henni sitja árið 2017-2018:
Bryndís Hrönn Ragnarsdóttir, myndlistarmaður (SÍM)
Sigrún Hrólfsdóttir, deildarforseti myndlistardeildar Listaháskóla Íslands
Magnús Gestsson, formanneskja Listfræðafélags Íslands
Margrét Elísabet Ólafsdóttir, fulltrúi safnstjóra íslenskra safna
Margrét Kristín Sigurðardóttir, formaður Myndlistarráðs

Hægt er að tilnefna til verðlaunanna á heimasíðu myndlistarsjóðs, www.myndlistarsjodur.is, til og með 17. janúar næstkomandi.

Nánari upplýsingar hvernig tilnefnt er má finna á síðu verðlaunanna: www.facebook.com/myndlistarverdlaun

Facebook Auto Publish Powered By : XYZScripts.com