Gerðuberg – Listamannaspjall í sýningarlok / Sara & Svanhildur

                                                         sara_og_svanhildur

 

Nú fer hver að verða síðastur! Sýningunni Stund milli stríða lýkur nú um helgina. Sara og Svanhildur Vilbergsdætur verða á staðnum á sunnudaginn og bjóða upp á leiðsögn kl. 15. Opnunartími sýninga í Gerðubergi er kl. 8 – 18 virka daga og kl. 13 – 16 laugardag og sunnudag.

Systurnar Sara og Svanhildur Vilbergsdætur eru listmálarar sem vinna verk sín algjörlega saman frá hugmynd að fullkláruðu verki. Sýning þeirra Stund milli stríða hefur staðið yfir í Gerðuberg frá því í lok janúar. Sýningin hefur vakið mikla athygli gesta enda eru verkin litrík og kátleg því húmorinn er aldrei langt undan. Á sýningunni takast þær á við sammannlegar hremmingar og stundir milli þeirra stríða. Titill sýningarinnar vísar til sólarlandaferðar sem þær systur fóru í til Tenerife árið 2011 en eftir á líta þær á ferðina sem stundina á milli stríða því árið 2009 átti Svanhildur við krabbamein að stríða og árið 2012 lenti Sara í hjartastoppi. Umfjöllunarefnið í myndunum er reynsluheimur systranna sem á erindi við fleiri en þær sjálfar, þar sem þær skoða einnig táknmyndir úr listasögunni og dægurmenningu og setja í samhengi við daglegt amstur með tilheyrandi karnivali, tragedíum og sólböðum.

 

Sara og Svanhildur eru fæddar á Ísafirði 1956 og 1964 og útskrifaðar úr Myndlista- og handíðaskóla Íslands 1985 og 1994. Þær hafa lengi unnið að myndlist hvor í sínu lagi en á Menningarnótt 2010 hófu þær fyrir tilviljun sameiginlegt ferðalag um hvunndags- og ævintýralönd, með liti og striga í farteskinu. Á ferðalaginu sem enn stendur, og allsendis óvíst hvenær lýkur, hafa þær málað ötullega og haldið nokkrar málverkasýningar. Fyrsta sýning þeirra “Systrasögur” í Listasafni ASÍ árið 2012 fékk mikla athygli og metaðsókn.

 

Þrátt fyrir að vera systur eru þær Sara og Svanhildur töluvert ólíkar, en fyrir einhverja töfra eða galdur vinna þær saman sem ein manneskja þegar kemur að hugmyndavinnu, undirbúningi og framkvæmd sameiginlegra málverka sinna. Verk þeirra eru að stórum hluta til sjálfsmyndir sem sýna þær á raunsæjan hátt í hversdagslegum aðstæðum, en vísa um leið út og suður í ævintýraheima og listasöguna.

 

 

Nánari upplýsingar veita:

 

Margrét Valdimarsdóttir, Verkefnastjóri Gerðubergi, sími 575 7715 / 848 0683, netfang: margret.valdimarsdottir@reykjavik.is.

Borgarbókasafn – menningarhús Gerðubergi, Gerðubergi 3-5, 111 Reykjavík.

 

Listakonurnar:

Netfang: duosisters@gmail.com, heimasíða: www.duosisters.com

Sara Vilbergsdóttir – sími 895 2001

Svanhildur Vilbergsdóttir – sími 694 4612

 

Athugið:

 

Borgarbókasafnið menningarhús Gerðubergi, Gerðubergi 3-5, 111 Reykjavík.

Um áramót sameinuðust Borgarbókasafn Reykjavíkur og Menningarmiðstöðin Gerðubergi í Borgarbókasafnið menningarhús. Starfstaðir Borgarbókasafns eru aðgreindir eftir staðsetningu til dæmis, Borgarbókasafnið menningarhús Gerðubergi.

 

WP2Social Auto Publish Powered By : XYZScripts.com