Galilean Moons 3 2018 Archival Inkjet Print Mounted On Aluminum 45 X 60 Cm

Fyrsta einkasýning Theresu Himmer ‘Levania’ í Hverfisgalleríi

Næstkomandi laugardag, 8. september kl 16.00, opnar fyrsta einkasýning Theresu Himmer, Levania í Hverfisgalleríi við Hverfisgötu 4.

Theresa Himmer fæddist í Árósum í Danmörku árið 1976. Hún lauk MFA-gráðu við myndlistarskóla í New York og var þar næst eitt ár á sérstakri námsbraut við Whitney-listasafnið í sömu borg. Áður hafði Himmer tekið meistaragráðu í arkitektúr við Arkítektaskólann í Árósum. Theresa Himmer bjó á Íslandi um langt skeið, á árunum 2005 til 2017.

Sýningin Levania er fyrsta birtingarmynd lengra verkefnis sem á rætur sínar í skáldsögunni Somnium (eða Draumnum, eins og titillinn var þýddur) eftir Johannes Kepler frá árinu 1608.

Í Somnium birtir Kepler nákvæma lýsingu á því hvernig alheimurinn (og jörðin) gætu litið út séð frá tunglinu og þess vegna er sagan talin grundvallarverk í tunglfræðum. Um leið er hún talin ein fyrsta vísindaskáldsagan.

Skáldsagan ber merki vísindalegra rannsókna, sjálfsævisögunnar og ómengaðs skáldskapar og aðalpersónan er Duracotus, íslenskur drengur. Röð ýmissa atvika lýkur með því að Duracotus kemur til Danmerkur og nemur þar himinfræði undir handleiðslu hins fræga stjörnufræðings Tycho Brahe á dönsku eyjunni Hveðn. Við heimkomuna til Íslands dýpkar hann svo þekkingu sína á stjörnunum enn frekar undir leiðsögn móður sinnar, Fiolxhilde, fjölkunnugrar konu sem sér fyrir sér með sölu jurtalyfja. Hún særir fram blíðlyndan anda utan úr geimnum sem lýsir í smáatriðum fyrir þeim alheimseyjunni Levaniu. Sú frásögn er í raun lýsing Keplers á tunglinu og geimnum (þ.á m. jörðinni), eins og séð frá tunglinu sjálfu.

Í Somnium birtist himininn, þá sérstaklega tunglið (Levania), sem brennidepill tveggja aðgreindra máta skynjunar og þekkingarsköpunar. Annars vegar er um að ræða hina vísindalegu aðferð, studda tæknilegum búnaði og setta fram af Tycho Brahe, fræðimanni og lærimeistara. Hins vegar er hið dulræna, sem byggir á áþreifanlegri reynslu og fulltrúi þess er móðirin, Fiolxhilde, sem deilir þekkingu kynslóðanna áfram til sonar síns.

Á sýningu Theresu Himmer sameinar Speglað ljós hin tvö aðskildu listaverk Dormant Echoes og Infinite Transmission. Dormant Echoes er röð óljósra, loftkenndra ímynda úr sjálflýsandi litarkornum sem festar eru milli gagnsærra akrýlplatna og minna á það sem sést í gegnum linsu smásjár. Infinite Transmissions er hins vegar innrömmuð samsetning, mynduð úr þríhyrningum sem speglast og snúast vélrænt. Þríhyrningarnir varpa í eilífri hringrás mjúkri birtu á helming myndanna í Dormant Echoes og vekja litina þannig til lífs. Umhverfisbirtan í galleríinu virkjar hinn helming verksins. Á sama hátt og stjörnur og ský á himnum geta birt okkur stórkostlegar myndanir og furðuverur, breytast sjálflýsandi formin í sífellu frá óhlutbundnu formleysi í kraftmiklar myndir, með reglubundnum sveiflum litarkornanna milli óvirks ástands og geislandi endurskins.

Sýningin Levania stendur til 13. október.

WP2Social Auto Publish Powered By : XYZScripts.com