SÍM

Hugmyndir sem detta inn í andvökunni verða að nýju myndverki í litum eða svarthvítu.

Aðalheiður stundaði nám við Myndlista- og handíðaskóla Íslands 1967-1970 og við Konstfack í Stokkhólmi 1977-1980, þaðan sem hún útskrifaðist sem textílhönnuður. Hún lærði grafík og litun við Konstnärernas kollektiva verkstad í Stokkhólmi 1979-1980. Hún kenndi við textíldeild Myndlista- og handíðaskóla Íslands 1982-1987 og við Myndlistaskóla Reykjavíkur 1982-1985. Hún starfaði sem kennari í myndlist barna við grunnskóla Hafnarfjarðar 1990-2017.

Á árunum 1999-2005 rak hún Litla myndlistaskólann fyrir börn í Hafnarfirði. Aðalheiður er meðlimur í Sambandi íslenskra myndlistarmanna (SÍM) og hefur um árabil verið félagi í Íslenskri Grafík. Ásamt öðrum listamönnum rak Aðalheiður Gallery Langbrók 1983-1985, Listhús 39 í Hafnarfirði og Meistara Jakob í Reykjavík 1994-2004. Frá árinu 2005 hefur hún rekið Gallery Múkka og vinnustofu í Fornubúðum 8 við smábátahöfnina í Hafnarfirði. Aðalheiður hefur haldið um 30 einkasýningar á Íslandi, í Finnlandi og Svíþjóð. Hún hefur tekið þátt í fjölda samsýninga, bæði alþjóðlegum og innlendum hönnunar- og grafíksýningum á Íslandi, í Noregi, Svíþjóð, Danmörku, Færeyjum, Finnlandi, Eistlandi, Þýskalandi, Króatíu, Kína, Ítalíu og Frakklandi.

Aðalheiður dvaldi á vinnustofu í Sveaborg, Finnlandi 1990, og í Loviisa, Finnlandi 2010 og 2015. Aðalheiður vinnur í ólíka miðla. Í grafíkinni vinnur hún með blandaða tækni í einþrykki og í vatnslitamyndum hennar má finna ótal blæbrigði lita og mynsturs sem eru henni hugleikin og sótt í náttúruna. Einnig vinnur hún með klippimyndir í akrýl og pappír, fantasíukenndar smámyndir og stærri verk. Á síðari árum hefur hún einnig unnið með handverk, grafíkbauka í pappa og íslenskri furu, auk smáfugla í leir og rekavið. Tauþrykkið á enn hug hennar og ný mynstur, sótt í náttúruna, hafa orðið til. Hún hefur m.a. unnið púða sem einstakt handverk. Að vinna með börnum í myndlist hefur verið henni mjög hugleikið og hvetjandi í sköpunarferli hennar.

Sýningaropnun verður fimmtudaginn 5. desember frá 18:00-20:00 og allir velkomnir!

Aðrir opnunartímar:
Föstudagur 6. desember 15:00 - 20:00
Laugardagur 7. desember 13:00 - 18:00
Sunnudagur 8. desember 13:00 - 18:00

Viðburðurinn er styrktur af Menningar og ferðamálanefnd Hafnarfjarðarbæjar.