Finnbogi Pétursson í Gallerí Gróttu

11229846_393852767478713_3715373373927207711_o
Finnbogi Pétursson rær á ný mið í Gallerí Gróttu
Verk Finnboga Péturssonar setja sterkan svip á Seltjarnarnesbæ um þessar mundir. Finnbogi hefur á undanförnum árum komið fram með heillandi innsetningar þar sem ólík listform skapa nýjar hæðir í samspili skúlptúrs, hljóðs, vatns, ljóss og arkitektúrs. Listamaðurinn rær hins vegar á ný mið í verkum sínum á sýningu, sem verður opnuð í Gallerí Gróttu næstkomandi fimmtudag 27. ágúst kl. 17, undir yfirskriftinni
Sjólag.

Þar sýnir Finnbogi tvívíð verk sem mynda eins konar stillimyndir af sjávarlandslagi. Með aðstoð tölvustýrðs rita og lögmálum hnitakerfisins dregur Finnbogi upp mynd af yfirborði sjávar út af Eskifirði þar sem munnmælasögur og gömul rit lýstu staðsetningu fengsælla miða. Í íslenskri atvinnusögu voru fá leyndarmál betur varðveitt og staðsetning fiskimiða, en hvert verk býr yfir sögu um slíka leiðarlýsingu.
Teikningarnar sjálfar taka svo mið af fyrirframgefinni sjóveðurspá, vindstefnu og ölduhæð.

Finnbogi lærði við Myndlista- og handíðaskóla Íslands og síðan við Jan Van Eyck Akademíuna í Hollandi. Hann hefur sýnt víða um heim og var fulltrúi Íslands á Feneyjatvíæringnum árið 2001.

Annað verk eftir Finnboga, Infra, er einnig til sýnis í ófullgerðu sýningarými skammt frá Nesstofu. Um er að ræða viðamikla og magnaða innsetningu vatns, hljóðs og ljóss. Það sýningarými er opið daglega til 31. ágúst frá kl. 13-17.

Gallerí Grótta er opin mán.-fim. 10-19, fös. 10-17.
Í tilefni af bæjarhátíð Seltjarnarness, sem fram fer um helgina, verður sýningin einnig opin laugardag 29. og sunnudag 30. ágúst kl. 13-17.

Sýningin stendur til 18. september.
Allir eru velkomnir og aðgangur er ókeypis.

WP2Social Auto Publish Powered By : XYZScripts.com