Eyrarrósin 2015

Þekkir þú mögulega Eyrarrósarhafa 2015?

Byggðastofnun, Flugfélag Íslands og Listahátíð í Reykjavík veita í ár viðurkenningu fyrir framúrskarandi menningarverkefni utan höfuðborgarsvæðisins í ellefta sinn. Ef þú þekkir mögulega Eyrarrósarhafa 2015, hvetjum við þig til að áframsenda þeim póstinn. 

Handhafi Eyrarrósarinnar hlýtur 1.650.000 krónur og flugferðir frá Flugfélagi Íslands. Tíu verkefni verða valin á Eyrarrósarlistann en af þeim hljóta þrjú verkefni tilnefningu til Eyrarrósarinnar og fá í sinn hlut bæði peningaverðlaun og flugmiða frá Flugfélagi Íslands. Eitt þeirra hlýtur Eyrarrósina sem Dorrit Moussaieff forsetafrú og verndari Eyrarrósarinnar, afhendir.

Áhöfnin á Húna hlaut Eyrarrósina 2014
Eyrarrósin beinir sjónum að og hvetur til menningarlegrar fjölbreytni, nýsköpunar og uppbyggingar á sviði menningar og lista. Verðlaunin  eru mikilvæg enda um veglega upphæð að ræða, en tilnefning til Eyrarrósar er einnig mikilsverður gæðastimpill fyrir þau afburða menningarverkefni sem hana hljóta. Umsækjendur geta meðal annars verið stofnanir, tímabundin verkefni, söfn og menningarhátíðir.

Fyrri Eyrarrósarhafar eru: 
Áhöfnin á Húna, Skaftfell, miðstöð myndlistar á Austurlandi, Safnasafnið á Svalbarðsströnd, Sumartónleikar í Skálholtskirkju, tónlistarhátíðin Bræðslan, Landnámssetrið í Borgarnesi, rokkhátíðin Aldrei fór ég suður, Strandagaldur á Hólmavík, LungA, listahátíð ungs fólks á Austurlandi og Þjóðlagahátíðin á Siglufirði.

Ef þú veist um framúrskarandi menningarverkefni hvetjum við þig til að áframsenda þeim póstinn.

Umsóknarfrestur um Eyrarrósina 2015 er til miðnættis þann 8. febrúar 2015 og skulu umsóknir sendar rafrænt á eyrarros@artfest.is. Allar nánari upplýsingar eru á vef Listahátíðar í Reykjavík, www.listahatid.is/eyrarrosin.

WP2Social Auto Publish Powered By : XYZScripts.com