IMG 0931

Ertu alveg viss? | Sýning í Grófinni

Stutt innlit í Brennu-Njáls sögu

Sýning á Borgarbókasafninu í samstarfi við Gagarín og Kristínu Rögnu Gunnarsdóttur

Opnun 14. febrúar kl. 17:00-19:00

Áður fyrr var orðstír þinn byggður á skoðunum fólks og orðum þeirra. Verður orðstír þinn í framtíðinni ákvarðaður af tilviljunarkenndum algóritmum snjallsamfélagsins?

Í innsetningu Gagarín á sýningunni á Borgarbókasafninu í Grófinni verður notuð myndgreiningartækni til að greina svipbrigði og tengja þannig við tilfinningar fólks við lestur Brennu-Njáls sögu. Tæknin sem notast er við er algengt markaðstól og verður sífellt vinsælla. Hér gefst tækifæri til að sjá hvernig slík tækni virkar í hlutlausu umhverfi bókasafnsins.

Sýningin verður opnuð 14. febrúar og mun standa til 30. mars. Á opnun mun Guðmundur Andri Thorsson rithöfundur halda erindi um sæmd og skömm í Brennu-Njáls sögu. Reykjavík er fyrsti viðkomustaður sýningarinnar en að því loknu heldur hún til Noregs og því næst til Danmerkur.

Getum við sett okkur í spor Njáls, Gunnars, Hallgerðar og Bergþóru? Er almenningsálitið að drepa okkur eða er það kannski það sem eina sem heldur í okkur lífi?

Brennu-Njáls saga er án efa ein vinsælasta Íslendingasagan og er mikilvægur hluti af menningararfi íslensku þjóðarinnar. Í sögunni takast á sterkar persónur í heimi þar sem heiður og virðing skipta öllu máli. Gestum í Grófinni er boðið að velta fyrir sér hvernig tekist er á við sæmd og skömm í sögunni og hvort upplifun sögupersóna sé svipuð því sem við þekkjum í samfélaginu okkar í dag.

Kynnt verður hvernig hægt er að miðla söguheimi bókmenntanna á annan hátt en venjan er og kynntar verða nýjar boðleiðir til gesta bókasafnsins. Brennu-Njáls saga er kjörinn vettvangur fyrir slíkar tilraunir þar sem um er að ræða verk sem flestir Íslendingar þekkja og talar til þjóðarinnar. Njála er lifandi verk eins og sjá má á þeim óteljandi aðlögunum sem hafa verið unnar upp úr verkinu. Markmiðið er að vekja áhuga gesta á bókmenntaarfinum sem og þeim nýju boðleiðum sem tæknin býður upp á.

Sýningin er samstarfsverkefni Borgarbókasafnsins, Gagarín og þriggja bókasafna í Kaupmannahöfn. Myndlýsingar gerði Kristín Ragna Gunnarsdóttir listakona.

Verið velkomin á Borgarbókasafnið í Grófinni þar sem söguheimur Njálu bíður ykkar, opinn öllum.

WP Facebook Auto Publish Powered By : XYZScripts.com