16107296 540072756187769 1191813127554538101 O

ART OF MEMORY Í VASULKA-STOFU

Í tilefni 80 ára afmælis Woody Vasulka (f. 20.011937) efnir Vasulka-stofa til sérstakrar sýningar á vídeóverkinu Art of Memory, en 30 ár eru liðin síðan verkið var frumsýnt, 1987.

Verkið er viðeigandi á þessum tímamótum þar sem áhorfandinn er með áhrifaríkum hætti leiddur inn í fortíðina, þar sem ferðast er um draumkennt og víðáttumikið landslag með skírskotunum til sögunnar.

Á sýningunni má einnig sjá brot úr gagnasafni Vasulka-stofu.

Steina og Woody Vasulka hafa haldið vel utan um arfleifð sína og varðveitt þau gögn sem tengjast list þeirra og starfi. Við stofnun Vasulka-stofu, undir lok árs 2014, gáfu þau Listasafni Íslands stóran hluta af gagnasafni sínu til varðveislu, en í því er meðal annars að finna upprunaleg listaverk, skissubækur, heimildarmyndir, bókasafn, ljósmyndir, sýningarskrár, viðurkenningar, greinar, plaköt og persónuleg skjöl.

Sýningin stendur yfir til 1. september 2017.

Art of Memory
Woody Vasulka
1987, 36 mínútur, í lit og með hljóði

Art of Memory er mikilfenglegt verk, frumleg og þroskuð framsetning á rannsókn Woody Vasulka á merkingu skrásettra mynda. Með því að byggja upp reimleikaleikhús minninga úr sjónarspili kvikmyndaðra og rafrænna mynda, fellir Woody Vasulka saman og umbreytir sameiginlegu minni og sögu í torræðu rými og tíma. Hið stórfenglega landslag suðvesturríkja Bandaríkjanna er goðsagnakenndur vettvangur sem hann greypir í fréttakvikmyndir úr stríðinu — draugalegar myndir sem verða að sveigjanlegum, skúlptúrískum formum fyrir tilstilli stöðugra rafrænna ummyndana.
Í þessari myndhverfðu sýn verður hin skrásetta mynd að minnismerki um fortíðina; sagan verður að menningarlegu minni fyrir tilstilli ljósmynda og kvikmynda. Vasulka staðsetur sálrænt áfall sögu 20. aldar í kvikmyndum af ofbeldisverkum, þar á meðal eru spænska borgarastyrjöldin, rússneska byltingin, seinni heimsstyrjöldin og tilkoma kjarnorkusprengjunnar. Undir yfirgnæfandi vængjaðri veru samviskunnar virðast sagan og minningin grátt leikin af sögunni og myndrænum minningum. Í hrífandi sambræðslu stríðstóla og véla sögunnar og fjölmiðla tekst Woody Vasulka að byggja upp napurt og að endingu átakanlega harmrænt minningaleikhús.

Með Daniel Nagrin, Klein. Raddir: Doris Cross. Videotools: Rutt/Etra, Jeffrey Schier.
Í samvinnu við Bradford Smith, Penelope Place, Steinu, David Aubrey.

WP2Social Auto Publish Powered By : XYZScripts.com