20180906 214610

AFTUR í Mjólkurbúðinni – Sal Myndlistarfélagsins á Akureyri

Dagrún Matthíasdóttir opnar Myndlistasýninguna AFTUR í Mjólkurbúðinni – Sal Myndlistarfélagsins í Listagilinu á Akureyri, laugardaginn 8. september kl. 15

Dagrún sýnir olíumálverk sem hún tengir við náttúrufegurðina, snjóinn og bráðnun hans með persónulegri nálgun. Olíumálverkin eru landslagsverk, litanotkun og pensilskrift lagskipt, flæðandi og tilviljanakennd í bland við nákvæmni í myndefninu sjálfu.

Dagrún Matthíasdóttir um sýninguna:
,,Ég velti mikið fyrir mér hvaða titill passar á sýninguna mína í Mjólkurbúðinni. Að hluta til er ég að kveðja þetta fallega rými sem ég hef starfað í en um leið og ég fagna því að Myndlistarfélagið taki við keflinu og fagna líka að öll starfssemin er komin á fullt aftur í húsi Listasafnsins á Akureyri eftir miklar framkvæmdir og endurbætur. Ég set upp málverk sem ég málaði á þessu ári sem ég hef sýnt á Ísafirði og í Danmörku og sýni þau hér aftur núna í Mjólkurbúðinni – Sal Myndlistarfélagsins. Endurteknig og flæði á sér stað í máluninni hjá mér og þó viðfangsefnið sé fremur kalt reyni ég að koma að hlýju í litavali og túlkun. Þegar ég mála landslagið leita ég aftur í fjöllin, fjöllótt landslag með snjó, ís sem bráðnar og um leið og ég hugsa um hvernig má sporna við hnattrænni hlýnun. Ég er ákaflega þakklát því að fá að sýna AFTUR í Mjólkurbúðinni”.

Undanfarin sex ár hefur Dagrún stjórnað sýningarhaldi í Mjólkurbúðinni en nú í haust ákvað hún að flytja sig til og starfa með RÖSK Listhópi í nýrri vinnustofu sem kallast RÝMI og er staðsett í húsi Listasafnsins á Akureyri. Þar verður listhópurinn með opna vinnustofu vikulega og einnig sýningar og viðburði á gildögum.

Dagrún er félagsmaður í SÍM, Myndlistarfélaginu og í Félagi Vestfirskra Listamanna. Hún hefur haldið 20 einkasýningar og tekið þátt í fjölmörgum samsýningum bæði hér heima og erlendis. Einnig hefur hún tekið þátt í listaverkefnum eins og Kunst I Natur í Noregi, gestadvöl í Ungverjalandi og á Máritíus í SA Afríku.

Myndlistasýning AFTUR í Mjólkurbúðinni – Sal Myndlistarfélagsins er opin laugardaga og sunnudaga kl. 14-17 og stendur til 16. september og eru allir velkomnir.

WP2Social Auto Publish Powered By : XYZScripts.com