Heildarmynd 1200

Samkeppni um gerð listaverks til að minnast atvinnuþátttöku kvenna við Gömlu höfnina í Reykjavík

Faxaflóahafnir fagna í ár 100 ára afmæli Gömlu hafnarinnar í Reykjavík. Af því tilefni hefur verið ákveðið að efna til samkeppni um gerð útilistaverks við Gömlu höfnina þar sem minnst verður hlutdeildar kvenna í starfssemi og sögu hafnarinnar. Auglýst er eftir myndlistarmönnum til að taka þátt í forvali að lokaðri hugmyndasamkeppni.

Hugmynd
Listaverkinu er ætlað að minnast atvinnuþátttöku kvenna við Gömlu höfnina í Reykjavík. Verkið mun verða kennileiti við Gömlu höfnina og hluti af því margbreytilega svæði sem nær frá Hörpu út á Granda. Mikilvægt er að verkið taki tillit til umhverfisins og falli vel að svæðinu.

Verk og staðsetning
Svæðið sem um ræðir nær frá Miðbakka að Sjóminjasafninu á Grandagarði. Umsækjendum er frjálst að koma með tillögu að staðsetningu á einhverjum af þeim stöðum sem merktir hafa verið inn á kort sem má nálgast á vef Faxaflóahafna. Verkið þarf að geta staðið sjálfstætt og því ekki gert ráð fyrir að verkið tengist öðrum byggingum eða mannvirkjum.

Samkeppnin
Samkeppnin mun fara fram samkvæmt samkeppnisreglum Sambands íslenskra myndlistarmanna (SÍM). Um er að ræða lokaða samkeppni með forvali. Sérstök forvalsnefnd skipuð fulltrúum frá Faxaflóahöfnum og SÍM mun velja úr innsendum umsóknum allt að fimm myndlistarmenn til þess að taka þátt í samkeppninni. Þeir listamenn sem valdir verða til þátttöku í lokaða hluta keppninnar fá greiddar 400.000 kr. hver fyrir að skila inn vel útfærðri tillögu. Dómnefnd skipuð fulltrúum Faxaflóahafna og SÍM mun síðan velja eina af tillögunum til útfærslu. Vinningstillagan mun hljóta 600.000 kr. í verðlaun.

Fjárhagsrammi
Faxaflóahafnir munu standa straum af öllum kostnaði við gerð og uppfærslu verksins, en heildarkostnaður má nema allt að 20 miljónum króna. Innan þess fjárhagsramma skal rúmast allur kostnaður við verkið; undirbúningur, efni, framkvæmd og aðkeypt vinna auk höfundargreiðslu og þóknunar til listamannsins.

Umsókn um forval:
Rétt til að sækja um í forvali hafa allir myndlistarmenn. Rafrænt umsóknareyðublað er að finna á vef Faxaflóahafna. Í umsókninni skal gera grein fyrir áhuga á verkefninu, forsendum og hæfni til að útfæra varanlegt útilistaverk auk lauslegrar hugmyndar að fyrirhuguðu verki. Umsóknir um þátttöku í samkeppninni verða að hafa borist fyrir kl. 17:00 mánudaginn 24. apríl næstkomandi.

Öllum umsækjendum í forvalshluta verður svarað fyrir 22. maí. Skilafrestur tillagna í lokaða hluta samkeppninnar verður 18. september og munu úrslit hennar kynnt um miðjan október.

Nánari upplýsingar er að finna á vef Faxaflóahafna: http://www.faxafloahafnir.is/samkeppni/

Facebook Auto Publish Powered By : XYZScripts.com