Ráðstefnuhlé Vitbrigða Vesturlands

Ráðstefnuhlé Vitbrigða Vesturlands, 2015

Hugheimum, Borgarnesi 14. -15. nóvember 2015

Ráðstefnuhlé Vitbrigða Vesturlands verður haldið í annað sinn í Hugheimum, nýsköpunar- og frumkvöðlasetri í Borgarnesi um næstu helgi. Í stað þess að halda eiginlega ráðstefnu er megináhersla lögð á hléin á milli atriða þar sem skapandi fólk ræðir saman um hugmyndir og menningu. Meðfylgjandi er dagskrá viðburðarins, en í tilefni hans er gefið út blað Vitbrigðanna í samvinnu við Skessuhornið, málgagn Vesturlands sem dreift verður með blaðinu.

Vitbrigði Vesturlands eru samtök ungs fólks á Vesturlandi sem starfa innan skapandi greina. Innan samtakanna sem telja um 70 félagsmenn eru m.a. arkitektar, grafískir hönnuðir, myndlistarmenn, tónlistarmenn, skáld, kvikmyndagerðarmenn og fleiri. Markmið samtakanna er að skapa tengslanet skapandi fólks, styrkja skapandi greinar í atvinnulífi landshlutans og ekki síst vekja athygli grunn- og framhaldsskólanema á skapandi greinum sem framtíðarstarfsvettvangi. Samtökin voru stofnuð á Safnasvæði Akraness í nóvember 2013 og fagna því tveggja ára starfsafmæli um næstu helgi. Á þessum tveimur árum hefur VV staðið að áðurnefndu Ráðstefnuhléi auk þess að halda „Kaffistopp“ samtakana víðsvegar um Vesturland. Það er gert til að styrkja tengslanetið og vekja athygli á því blómlega menningarstarfi sem ungt fólk starfar við í landshlutanum. Að auki eru samtökin bakland sinna félagsmanna og viðburða og leitast við að koma til hjálpar ef svo ber undir.

Innan Vitbrigðana starfar fagfólk í sínum greinum og má nefna Kára Viðarsson með Frystiklefann á Rifi, Dögg Mósesdóttur og Northern Wave Film Festival, Soffíu Björg Óðinsdóttur tónlistarmann og Bryndísi Geirsdóttur og Guðna Pál Sæmundsson sem framleiða þættina Hið blómlega bú.

Ef einhverjar spurningar eða áhugi kann að vakna þá endilega hafið samband við undirritaðan.

Fyrir hönd stjórnar VV,

Sigursteinn Sigurðsson

Formaður VV og arkitekt FAÍ

 

11666262_512538842254671_4909536330973284434_n

Facebook Auto Publish Powered By : XYZScripts.com