Gudmundur

Landið fyrir ofan regnbogann

Sýningin Landið fyrir ofan regnbogann opnar fimmtudaginn 16. mars nk. kl. 16:30 á Reykjavíkurtorgi Borgarbókasafnins í Grófinni. Sýninging er opin daglega til 9. apríl. Sýningin er fyrsta sýning í röð vorsýninga Listar án landamæra árið 2017

Á sýningunni munu 11 listamenn úr Vinnustofu Myndlistarskólans í Reykjavík sýna yfirlit nýlegra verka. Í Vinnustofunni geta meðlimir annars vegar unnið sjálfstætt að list sinni undir handleiðslu kennara sem allir eru myndlistamenn. Hins vegar er boðið uppá kennslu í tækni, efni og aðferðum fyrir nýja meðlimi eins og hentar hverju sinni, Vinnustofan er því sérsniðið að þörfum hvers og eins og skapar vettvang til tilrauna, samtals og þróunar í listsköpun hvers listamanns. Margir meðlimir í Vinnustofunni hafa verið virkir í listsköpun lengi vel og sýnt verk sín t.a.m. á vettvangi Listar án landamæra og í Safnasafninu á Svalbarðsströnd. Aðrir hafa verið styttra í Vinnustofunni en eru að þróa áhugaverðan og sjálfstæðan stíl í sinni listsköpun.

Margir listamannana hafa ekki aðgengi að meiri menntun á sviði lista hérlendis vegna fötlunar sinnar og fá því ekki tækifæri til þess að standa til jafns við aðra listamenn þrátt fyrir gífurlega hæfileika sína. List þeirra fær oftar en ekki litla umfjöllun og er ekki metin að sömu verðmætum og önnur list. Listamennirnir sem sýna eru allir mjög virkir í listsköpuninni og sinna henni jafn mikið og aðrir listamenn. Þeir nálgast list sína af metnaði, virðingu og hugsjón og eiga að standa til jafns við aðra listamenn.

List án landamæra leggur mikla áherslu á að auka sýnileika og jákvæða umfjöllun um fatlað fólk í fjölmiðlum. Við viljum stuðla að menningarlegu jafnrétti þessa hóps og auðga þannig fjölbreytileika mannlífsins.

Meðlimir í Vinnustofu eru: Ingi Hrafn Stefánsson, Ásgeir Ísak Kristjánsson, Kolbeinn Jón Magnússon, Guðmundur Stefán Guðmundsson, Hringur Úlfarsson, Lára Lilja Gunnarsdóttir, Sigurður Reynir Ármannsson, Elín S. M. Ólafsdóttir, Arna Ýr Jónsdóttir, Valdimar Leó Vesterdal og Gígja Garðarsdóttir

 

Facebook Auto Publish Powered By : XYZScripts.com