Framboð til stjórnar SÍM 2026
Kosið er um einn formann, tvo aðalmenn og einn varamann til tveggja ára í stjórn SÍM
Alls hafa sex manns boðið sig fram til stjórnarstarfa og hafa gildir félagar SÍM rétt til að kjósa
Fyrir kosningar verður sendur tölvupóstur til félagsmanna þar sem hægt verður að kjósa með rafrænum skilríkjum.
Opnað verður fyrir rafræna kosningu 27. maí.
Frambjóðendur til formanns
Anna Rún Tryggvadóttir
Kæru meðlimir,
Ég hef setið í stjórn SÍM síðastliðin tvö ár og á þeim tíma öðlast góða innsýn í starfsemi félagsins og mótað skýra sýn á það sem þarf að efla í rekstri, stefnu og ásýnd þess. Verði ég kjörin formaður mun ég leggja áherslu á tímabæra endurskoðun á rekstrarformi og hlutverki
SÍM. Rekstur félagsins þarf að vera gagnsær, sjálfbær og byggja á skýrum forsendum sem styðja við bætt starfsumhverfi myndlistarmanna og aukinn samfélagslegan skilning á mikilvægi myndlistar.
Ég vil: greina kostnað og ávinning núverandi rekstrarforms, draga úr tvíverknaði og óþarfa
umsýslu, efla gagnsæi og samskipti við félagsmenn, stuðla að samheldni og samstarfi innan myndlistarsamfélagsins. Formaður SÍM þarf jafnframt að vera öflugur málsvari félagsmanna og myndlistar í opinberri umræðu. Ég vil vinna að bættum kjörum, sterkari samningsstöðu og aukinni viðurkenningu á mikilvægi myndlistar í samfélaginu.
Myndlist hefur bæði menningarlegt og samfélagslegt gildi sem nær langt út fyrir efnahagslega mælikvarða. Mikilvægt er að SÍM sé faglegt, sameinandi og sýnilegt afl í þágu félagsmanna sinna og samfélagsins alls. Ég tel mig hafa þekkingu, innsýn og hæfni til að leiða félagið með ábyrgum og uppbyggilegum hætti.
Virðingarfyllst,
Anna Rún Tryggvadóttir
Jakob Jóhannsson
Ég er starfandi myndlistarmaður með SÍM vinnustofu á Korpúlfsstöðum. Mínar áherslur verða á kynningu og markaðssetningu á SÍM og þeim listamönnum sem þar eru félagar. Ég er menntaður grafískur hönnuður og hef unnið í áratugi við markaðsmál og gerð auglýsingaherferða. Hef unnið á stærstu auglýsingastofum landsins auk þess að hafa stofnað eigin auglýsingastofu sem á stuttum tíma var farinn að vinna fyrir mörg af stærstu fyrirtækjum landsins. Hef líka rekið eigið fyrirtæki á þessu sviði í nokkur ár í Svíþjóð.
Ég var hönnunarstjóri hjá RÚV og Stöð 2 í mörg ár og þekki því fjölmiðla mjög vel. Þessi reynsla öll mun án efa nýtast vel í þessu starfi við að koma þeirri góðu og þörfu list sem félagar SÍM eru að skapa betur á framfæri. Ég er fylginn mér og læt hluti gerast. Er mjúkur og lipur í samskiptum en get líka verið harður í horn að taka ef því er að skipta.
Ég hef reynslu af félagsmálum í sambandi við myndlist og ég er ritari FÍM félags íslenskra myndlistamanna.
Kjóstu mig kæri félagi ef þú vilt betri kynningu á því sem þú ert að gera í þinni myndlist.
Logi Bjarnason
Myndlistarmenn þurfa félag sem stendur þétt við bakið á þeim - í réttindamálum, húsnæðismálum, rekstri og sýnileika. Ég býð mig fram til formanns SÍM til að gera félagið skýrara, sterkara og gagnlegra fyrir félagsmenn í daglegu starfi þeirra.
Ég kem að þessu starfi bæði sem listamaður og stjórnandi. Ég þekki af eigin raun áskoranir myndlistarmanna: ótryggar tekjur, háan kostnað, skort á rými og þörf fyrir fleiri tækifæri til að koma verkum á framfæri.
Sem formaður Myndhöggvarafélagsins í Reykjavík frá 2015 hef ég sýnt í verki að hægt er að byggja upp öflugt fagfélag. Þar hef ég snúið taprekstri í hagnað, þrefaldað veltu og tvöfaldað fjölda félagsmanna. Sú reynsla, ásamt menntun minni í listum og opinberri stjórnsýslu og stjórnarsetu innan myndlistargeirans, nýtist beint í SÍM.
Ég vil einfalda rekstur félagsins, auka gagnsæi, nýta fjármuni betur og tryggja að félagsmenn viti hvaða þjónustu og réttindi þeir eiga aðgang að. Ég mun beita mér fyrir sterkari samningsstöðu, lægri leigukostnaði, auknum sýnileika, endurbættri listmessu og því að samkeppnisreglum SÍM sé fylgt.
Með þínu trausti vil ég byggja upp SÍM sem er sýnilegra, skilvirkara og sterkara afl fyrir okkur öll.
Frambjóðendur í stjórn
Ásdís Spanó
Ég sækist eftir kjöri til stjórnar SÍM til að leggja mitt af mörkum í baráttu fyrir bættum kjörum, réttindum og starfsskilyrðum myndlistarmanna.
Ég er myndlistarmaður og ráðgjafi á sviði myndlistar, menntuð við Listaháskóla Íslands, Accademia di Belle Arti í Bologna og Central Saint Martins í London. Þá hef ég lokið diplómanámi í safnafræði frá Háskóla Íslands og meistaragráðu í listkennslu frá Listaháskóla Íslands.
Starfsreynsla mín spannar sýningarhald hér heima og erlendis, ráðgjöf, nefndarstörf og trúnaðarstörf fyrir Myndlistarmiðstöð, Myndlistarráð og SÍM. Ég hef einnig komið að rekstri tveggja gallería og þekki því fjölbreyttar aðstæður og þarfir myndlistarmanna. Ég tel að SÍM þurfi að vera öflugur, sýnilegur og skýr málsvari myndlistarmanna. Félagið þarf að vinna af festu að langtímahagsmunum stéttarinnar, byggja á vönduðum stjórnarháttum og eiga virkt samtal við félagsmenn.
Í stjórn SÍM vil ég leggja sérstaka áherslu á:
• Þóknun og laun listamanna. Tryggja að greiðslur til myndlistarmanna séu í samræmi við taxta og viðmið SÍM.
• Myndlistarsjóður. Vinna að því að myndlistarsjóður vaxi í takt við raunverulegar þarfir og fjölda starfandi myndlistarmanna.
• Vinnustofur listamanna. Þrýsta á ríki og sveitarfélög um raunhæfar, fjármagnaðar og varanlegar lausnir í húsnæðismálum. Ég óska eftir þínum stuðningi til að fylgja þessum málum eftir í stjórn SÍM.
Búi Kristjánsson
Ég vil styðja við starf SÍM eftir bestu getu og taka þátt í því að efla stuðning stjórnvalda við starf félagsins. Þá sérstaklega hvað varðar vinnustofur og aðstöðu listamanna til að sinna sinni listsköpun.
Haraldur Karlsson
Kæru félagar og samstarfsfólk,
Eftir áratugi sem starfandi listamaður og virkur þátttakandi í uppbyggingu listasamfélagsins, tel ég mig hafa þá reynslu og sýn sem þarf til að styrkja okkar sameiginlega hagsmunafélag. Reynsla mín af störfum í þágu myndlistarfólks er fjölþætt — sem stofnandi og stjórnandi, kennari, sýningar- og hátíðarskipuleggjandi, meðlimur í úthlutunarnefndum og listamannareknum félögum.
Áratuga innsýn í norrænt og evrópskt menningarumhverfi hefur kennt mér að sjálfbær framtíð myndlistar krefst bæði þrautseiglu og stöðugrar baráttu fyrir réttindum okkar.
Mín helstu áherslumál:
• Betri kjör og aukin virðing: SÍM er okkar öflugasta tæki í samræðum við stjórnvöld og samfélagið. Ég vil sjá áþreifanlegar umbætur á kjörum myndlistarmanna — óháð tækni, efni eða sviði.
• Styrkjakerfi sem þjónar öllum: Ég vil vinna að því að úthlutunarferlar séu skýrir, réttláttir og nái til listamanna á öllum stigum ferilsins — frá nýliðum til reyndra fagmanna.
• Lifandi og virkur SÍM: Ég vil að SÍM verði áfram lifandi samfélag og styðjandi bakhjarl fyrir listamenn á öllum stigum ferilsins. Ég hlakka til að leggja mitt af mörkum við stjórnarborðið.
Haraldur Karlsson
Nánari upplýsingar um bakgrunn og verk: www.haraldur.net