Svavar Gudnason,I Slandslag 1944 Prent

Fjársjóður þjóðar: ný sýning í Listasafni Íslands & Leiðsögn 9. apríl

Ný sýning hefur nú verið opnuð í Listasafni Íslands undir yfirskriftinni Fjársjóður þjóðar, valin verk úr safneign. Í fórum Listasafns Íslands eru á tólfta þúsund verka af ýmsum gerðum, frá ýmsum löndum og ýmsum tímum. Á sýningunni Fjársjóður þjóðar er dágott úrval verka úr þessari safneign, sem gefur yfirlit yfir þróun myndlistar á Íslandi frá öndverðri nítjándu öld til okkar daga. Sýningin er í tveimur sölum safnsins og dregur fram fjölbreytni þeirra miðla og stílbrigða sem einkenna þessa stuttu en viðburðaríku sögu. Fyrstu áratugina byggðist safneign Listasafns Íslands einvörðungu upp á gjöfum, málverkum eftir höfðinglega erlenda listamenn, einkum danska og norræna, en upp úr þarsíðustu aldamótum urðu listaverk eftir Íslendinga æ meira áberandi. Þá má þakka rausnarskap ýmissa einstaklinga, listamanna og annarra, hversu hratt listaverkaeign safnsins jókst á síðustu öld. Margir frumherjar íslenskrar myndlistar arfleiddu þjóðina að verkum sínum en upp úr miðri öldinni óx innkaupasjóður Listasafns Íslands og við það stækkaði safneignin ört. Frá fínlegum teikningum Helga Sigurðssonar (1815–1888) af skáldinu Jónasi Hallgrímssyni (1807–1845) á dánarbeði til viðkvæmra samsetninga Margrétar H. Blöndal (f. 1970) úr fundnu efni er langur vegur og merkilegur. Þessa sögu og langtum lengri má lesa úr Fjársjóði þjóðar, þessum knappa hluta af safneign Listasafns Íslands. Sýningarstjórn skipa: Halldór B. Runólfsson, Birta Guðjónsdóttir og Steinar Ö. Atlason.

Sunnudaginn 9. apríl kl. 14.00 mun Rakel Pétursdóttir, safnafræðingur og deildarstjóri rannsókna og sérsafna við Listasafn Íslands verða með leiðsögn um sýninguna Fjársjóður þjóðar, valin verk úr safneign.

Rakel mun stikla á stóru í gegnum sögu og þróun Listasafns Íslands. Hún mun fjalla um aðföng safnsins í sögulegu og listrænu samhengi og tengja alþjóðlegum straumum og stefnum í myndlist með hliðsjón af völdum verkum á sýningunni.

Þátttaka gesta í þróun samtalsins mun verða leiðarstef þar sem sitt sýnist hverjum og staldrað verður við eftir þörfum en verk sýningarinnar eru sett upp í tímaröð. Horft verður gagnrýnum augum á gersemarnar þar sem velta má vöngum yfir spurningum á borð við; Hvers vegna þjóðarsafn? Og hver skapar söguna? Einnig má velta fyrir sér bæði hugmyndum og orsakasamhengi margvíslegra þátta er snerta völd og áhrif í íslenskri myndlist; mannréttindi og menningararf, menningarpólitík og raunveruleika, sjálfsmynd einstaklinga og þjóðar, forspár nýrra tíma, vægi og virðingu fyrir listrænni sköpun, myndlist sem skapandi afl þjóðfélagslegra umbreytinga og ekki síst töfrum og galdri hvunndagsins.