Image006

Bókstaflega – sýningarstjóraspjall 2. apríl í Hafnarborg

Sunnudaginn 2. apríl kl. 14 mun Vigdís Rún Jónsdóttir sýningarstjóri sýningarinnar Bókstaflega – Konkretljóð á Íslandi frá 1957 til samtímans ræða við gesti safnsins um sýninguna og aðdraganda hennar.

Hugmyndin um notkun bókstafa á myndrænan hátt hefur þróast á löngum tíma og á sér rætur að rekja allt aftur til myndleturs Forn-Egypta. Konkretljóð skutu fyrst upp kollinum á Íslandi um miðjan sjötta áratuginn. Í hugmyndalistinni, sem hóf innreið sína með nýrri kynslóð listamanna í upphafi áttunda áratugarins, öðlaðist tungumálið aukið vægi og byggðu verkin oft á textum, ljósmyndum og vídeói, auk gjörninga og innsetninga. Segja má að með tilkomu SÚM-kynslóðarinnar hafi konkretljóðaforminu fyrst verið beitt fyrir alvöru hérlendis.

Mikið vatn hefur runnið til sjávar síðan fyrstu konkretljóðin tóku að birtast og eins og sýningin gefur til kynna hefur sá straumur í ljóðagerð runnið í ótal farvegi og það er áhugavert að skoða hvernig listamenn og rithöfundar samtímans hafa kannað þanþol konkretljóðaformsins í gegnum breytta tækni og nýja sýn á framtíðina.

Listamenn sem eiga verk á sýningunni eru: Ásta Fanney Sigurðardóttir, Birgir Andrésson, Einar Bragi Sigurðsson, Emmett Williams, Dieter Roth, Guðbergur Bergsson, Guðjón Ketilsson, Halldór Ragnarsson, Haraldur Jónsson, Jón Laxdal, Kristinn E Hrafnsson, Kristján Guðmundsson, Magnús Pálsson, Margrét Bjarnadóttir, Ragnhildur Jóhanns, Sigríður Björnsdóttir, Sigurður Guðmundsson, Steingrímur Eyfjörð ásamt völdum skáldum sem hafa fengist við konkretljóðagerð.

Vigdís Rún Jónsdóttir er menntuð í listfræði frá Háskóla Íslands og fjallar meistararitgerð hennar um kortlagningu konkretljóða á Íslandi í listfræðilegu samhengi. Vigdís kom að uppsetningu á bókverka- og konkretljóðasýningunni Dadadíterdúr í tengslum við Dag myndlistar árið 2015 og er höfundur vefsýningarinnar Listamaður þjóðarinnar sem birtir hluta úr safneign Ásgríms Jónssonar fyrir Listasafn Íslands. Vigdís hefur auk þess skrifað fjölbreytta texta um sýningar og myndlistarumfjallanir.