Samband íslenskra myndlistarmanna var stofnað 20. nóvember 1982

Í Morgunblaðinu 20. október 1982 var svohljóðandi frétt: "Ákveðin hefur verði stofnun Sambands íslenskra myndlistarfélaga og verður stofnfundur haldinn  20. nóvember n.k að Hótel Borg.  Að stofnuninni standa eftirtalin myndlistarfélög:  Félag íslenskra myndlistarmanna, Hagsmunafélagið, Textílfélagið, Íslensk grafík, Myndhöggvarafélagið og Leirlistarfélagið, en alls hafa þess félög innan sinna vébanda u.þ.b. 250 manns."

"Var það hald manna á fundinum að ekki væri vanþörf á stofnun slíkra samtaka sem ynnu markvisst að hagsmunabaráttu. Var á það bent að myndlistarmenn hér á landi byggju við mjög ótrygga afkomu, þar sem þeir væru háðir duttlungum hins frjálsa markaðar. Töldu fundarmenn að það væri ekki annað en sanngirniskrafa að skapa myndlistarmönnum tryggari afkomu með auknum starfslaunum og verkefnum á vegum hins opinbera. Var í því sambandi vitnað í kafla úr riti UNESCO, þar sem fjallað er um stöðu og rétt listamanna. Þar segir:"

"Aðildarlöndunum ber að vernda og styrkja stöðu listamanna með því að líta svo á að vinna listamannsins, bæði í nýju og hefðbundnu formi, sé þjóðfélagsleg nauðsyn. Aðildarlöndunum ber að meta þannig störf listamanna að þeir fái notið sín og hljóti það fjárhagslega öryggi sem þeim ber fyrir starf sitt að menningarmálum."

Síðar í Morgunblaðinu 23. nóvember 1982 var frétt undir yfirskriftinni

"Samband íslenskra myndlistarmanna stofnað".

"Stofnað hefur verið Samband íslenskra myndlistarmanna, SÍM.  Að stofnfundinum stóðu eftirtalin myndlistarfélög: Félag íslenskra myndlistarmanna, Hagsmunafélagið, Textílfélagið, Íslensk grafík, Myndhöggvarafélagið og Leirlistarfélagið. Stjórn SÍM skipa:  Sigrún Guðjónsdóttir, formaður, aðrir í stjórn eru:  Jón Gunnar Árnason, Richard Valtingojer, Þór Pálsson og Jóna Guðvarðardóttir."

Haldin var sérstök afmælishátíð í tilefni af 20 ára afmæli SÍM, 20. nóvember 2002.

Í tilefni af 20 ára afmæli SÍM var einnig boðið upp á kvöldverð og ball á Veitingahúsinu

Café Victor, 22. nóvember 2002. Hljómsveitin Magga Stína og Hringirnir spiluðu fyrir dansi.  Góð aðsókn var að Listamannaballi SÍM og var ákveðið að gera þetta að árlegum viðburði.