UMSÓKN Í SÍM 

Breytt inntökuskilyrði í SÍM

Á síðasta aðalfundi kom góð ábending frá félagsmanni um að nú þegar stöðugt væri verið að fjölga þeim hlunnindum sem fylgja aðild að SÍM væri nauðsynlegt að gera nýútskrifuðum myndlistarmönnum kleift að ganga í sambandið. Á sambandsráðsfundi mánudaginn 25. október var ákveðið að breyta inntökuskilyrðum inn í SÍM og aðildarfélög SÍM og nægir nú að hafa lokið háskólaprófi eða sambærilegri menntun í myndlist til að komast inn í sambandið.

Um umsækjendur sem ekki hafa lokið prófi gilda svipaðar reglur og áður giltu um alla, þ.e. þeir þurfa að sýna fram á með öðrum hætti að þeir starfi að myndlist af fullri alvöru.

Aðildarfélögin geta hvert um sig hert sínar reglur ef þurfa þykir enda er í sumum tilvikum um að ræða aðgang að viðkvæmum verkstæðum eða verkfærum. Þó verða stjórnir þeirra að gæta þess að gera aldrei minni kröfur en gerðar eru fyrir inngöngu í SÍM þar sem aðild að einu aðildarfélagi SÍM þýðir jafnframt aðild að SÍM.  Sjá inntökuskilyrði og umsóknareyðublað í aðildarfélögin undir Aðildarfélög. 

Til að hafa rétt til inngöngu í Samband íslenskra myndlistarmanna þarf umsækjandi að hafa lokið háskólaprófi í myndlist frá viðurkenndum listaháskóla eða hafa aðra sambærilega menntun samkvæmt yfirlýsingu viðkomandi skóla.

Að öðrum kosti þarf umsækjandi að uppfylla fjögur af neðangreindum skilyrðum.

1.  Hafa aðra menntun í myndlist (t.d. nám á framhaldsskólastigi, námskeið, einkatíma eða annað)  staðfest með yfirlýsingu viðkomandi kennara/ skóla.

2. Hafa haldið eina eða fleiri einkasýningar í viðurkenndum sýningarstöðum.
 Staðfesting fylgi.

3. Hafa tekið þátt í alþjóðlegri sýningu, samsýningu styrktri af opinberum aðilum eða ekki færri en fimm samsýningum öðrum. 
 Staðfesting fylgi.

4. Hafa verið falið af dómnefnd, að vinna að listskreytingu á opinberum vettvangi.
Staðfesting fylgi.

5. Eiga minnst eitt verk í opinberri eigu, keypt af viðkomandi safnráði eða matsnefnd.
Staðfesting fylgi.

6. Hafa hlotið opinberan styrk eða starfslaun. 
Staðfesting fylgi.

Umsókn um aðild að SÍM er tekin fyrir af stjórn SÍM einu sinni í mánuði. 

Umsóknir skulu vera vandaðar.

Umsóknareyðublað